UC bag-ong hari sa CESAFI

CEBU, Philippines - Nabugto ang siyam ka tuig nga paghari sa University of the Visayas (UV) Green Lancers dihang gipakgang kini sa University of Cebu (UC) Webmasters pinaagi sa pag-iskor og kulbahinam nga kadaugan, 72-73 sa Game-4 sa "best-of-five" final series aron langkaton ang seniors basketball title sa 10th Cebu Schools Athletic Foundation Inc. (CESAFI) kagabii diha sa Cebu Coliseum.

Diriyot pa masugamak ang Webmasters dihang nabiyaan og uno punto, apan ang higanteng si Junemar Fajardo mihungit ogmahinungdanong basket aron angkonon ang korona sa labing unang higayon. 

Hapit usab mabulilyaso ang tinguha sa Webmasters nga masakiyo ang titulo human ang ilang 21 puntos nga labaw, 37-58, paghuman sa ikatulong kuwarter gikitkitan sa Lancers ug gani nakalabaw pa kini human napasulod ni Ralf Olivares ang iyang jumpshot, 70-69, sa nahabiling 30.7 segundos sa duwa.

 Ang salvador del mundo sa Webmasters nga si Fajardo mipaarak og 32 puntos aron pangulohan ang kalampusan sa Webmasters, samtang si Kelvin Juliane miamot og 15 puntos.  

Sila si Eman Calo ug Olivares mao usab ang nangulo sa nabuntog nga Lancers nga nagkumboya og 38 puntos.         

Puntos Matag Usa

UC (73) -   Fajardo 32, Juliane 15, Heruela 11, Bercede 10, Mohammad 4, Pao 1

UV (72) - Calo 20, Olivares 18, Mercader 9, Cincoflores 9, Lao 9, Silva 4, Saycon 2 Halftime: 34-29. – BANAT NEWS