Delos Santos, Carter nagtagsa'g korona

CEBU, Philippines - Managkaribal sa Cebu running scene nga sila si Mary Grace Delos Santos ug Madelyn Carter maoy kampiyon sa managlahing lumba kagahapon.

Kanunay nga magsangko ang dalan sa duha ka elite female runners sa Sugbu, apan lahi ang senaryo kagahapon kay managlahing lumba ang ilang giapilan. 

Usa ka adlaw human siya mikampiyon sa PSME Run, si Delos Santos milangkat na sab og laing titulo pinaagi sa Run to the Max Series 3 didto sa Holiday Gym and Spa sa Banilad, ning siyudad.

Ang international marathoner nga si Delos Santos mitapos sa lumba sud sa usa ka oras ug tres minutos aron langkaton ang 16K women's class crown. Nag-una lang siya og kuwatro minutos sa nagsunod niining si Mary Joy Tabal sa Southwestern University (SWU). Si Merlita Arias-Dunkin mipuwesto sa ikatulong

dapit.

Ang garbo sa Danao City nga si Philip Duenas (56:30) mipukan nilang Joselito Dugos (56:58) ug Elmer Bartolo (58:02) sa Davao nga nahimutang sa ikaduha ug ikatulo nga dapit sa 16k men’s division.

Sa iyang bahin, si Carter maoy mipuli sa trono nga gibiyaan ni Delos Santos, dihang iyang gidominar ang 12K women’s run sa 2nd Gullas Run didto sa Talisay City hall grounds.

Si Carter milabang sa finish line sa oras nga 50:32, nagsunod niya si Joeyry Lee (51:22.930) ug beteranang si Christy Sevilleno-Tutor (52.33.620) alang sa ikaduha ug ikatulong dapit.

Mirehistro usab og back-to-back championship si Joebert Carolino dihang midaog siya sa 12K men’s class sa oras nga 40:36.190.

Sama sa resulta sa PSME Run niadtong Sabado, sila si Adonis Singson (40.45.230) ug Riez Enriquez (42:52.490) mao gihapon ang mi-okupar sa ikaduha ug ikatulo nga dapit. (BANATSPORTS)