CEBU, Philippines - Sa tinguha nga ilhon ang Pilipinas isip usa sa mga potensiyal nga binyu alang sa world class boxing events sa kalibotan, ang ALA Boxing Promotions uban sa ABS-CBN Sports milusad sa “Pinoy Pride,” ang series sa mga dagkung boxing events nga bidahan sa ALA Boxing Gym stalwarts batok sa mga dekalibreng boksidor gikan sa laing nasud.
Sa news conference kagahapon diha sa Sports Exchange Bar and Grill, si ALA Promotions President Michael Aldeguer namahayag nga usa lang kini sa ilang mga lakang aron mas mailhan pa ang Sugbu isip usa sa mga lugar diin mahimo kang mosaksi og mga world class fight.
“Why go to Las Vegas to watch world caliber fights if we can promote it in our own country?” matud pa ni Aldeguer.
Mopasiuna sa "Pinoy Pride" trilogy mao ang sangka ni WBO Asia-Pacific bantamweight titlist AJ 'Bazooka' Banal (21-1-1, 17KOs) batok ni former two-division world champion Luis Alberto 'El Demoledor' Perez (26-4, 17KOs) karong Oktubre 30 diha sa Pacific grand ballroom sa Waterfront Cebu City Hotel and Casino.
"Daku kaayo akong kompiyansa kay akong training hard na kaayo," matud ni Banal.
Gipahibalo sa iyang chief trainer nga si Edmund Villamor nga anaa na sa 80 porsiyento ang kondisyon ni Banal paingon sa away.
Sa undercard sa Banal-Perez showdown mao ang sangka ni welterweight prospect Mark Jason Melligen (19-2, 13KOs) batok ni Bladimir Hernandez (18-3, 16KOs).
Sa laing sangka, ang batan-ong si Jason Pagara (23-1, 11KOs) nga makigbatok ni Thai boxer Sapapetch Sor Sakaorat (20-6, 11KOs), samtang ang garbo sa Toledo nga si Larry 'Bon Jovi' Canillas (15-2, 13KOs) makigharong sa beteranong si Ramie Laput (38-4, 17KOs) sa Davao City-based ABA Boxing Gym.
Ang "Pinoy Pride 2" nga gikatakda karong Nobiyembre 27 pangulohan ni Milan 'Melinyo' Melindo batok ni Colombian Carlos Tamara, samtang ang "Pinoy Pride 3" unya sa Enero 29 sunod tuig mao ang grudge rematch tali nila ni Rey 'Boom Boom' Bautista ug sa Mehikanong si Alejandro Barrera.
Si Bautista nidaog pinaagi sa controversial fourth round TKO batok ni Barrera atol sa ilang unang engkuwentro niadtong Agosto 28 diha sa Waterfront.
Nahunong ang away human nagisi ang walang kilay ni Barrera sa 1:14 sa round four nga naghatag og technical nga kadaugan ngadto ni Barrera dihang gideklara sa referee nga ang gisi gikan sa usa ka legitimate punch. (BANATSPORTS)