MANILA, Philippines - Isa lamang sa Letran Squires at St. Benilde junior Blazers ang magbubulsa sa ikaapat at huling silya sa Final Four sa juniors’ division ng 86th NCAA basketball tournament sa The Arena sa San Juan City.
Magtatagpo ang Squires at ang Junior Blazers ngayong alas-10 ng umaga upang pag-agawan ang No. 4 berth sa Final Four.
Iginupo ng Squires ang Jose Rizal Light Bombers, 87-73, noong Sabado sa San Juan Gym upang ayusin ang kanilang knockout match ng Junior Blazers.
Humakot si Mark Cruz, nakababatang kapatid ni PBA player Marvin Cruz, ng game-high 25 points mula sa kanyang 10-of-16 fieldgoal shooting bukod pa sa kanyang 6 assists, 4 rebounds at 1 steal para sa Squires.
Nagdagdag naman si Mc Jour Luib ng 20 points at 10 rebounds kasunod ang 15 points ni Aldrin Serafica para sa Intramuros-based dribblers.
Ang mananalo sa pagitan ng Junior Blazers at Squires ang siyang ookupa sa No. 4 seat kalaban ang nagdedepensa at No. 1 San Beda Red Cubs, habang makakasagupa ng No. 2 San Sebastian taglets ang No. 3 Perpetual Junior Altas.