Lucio Lim tilt karon na

CEBU, Philippines - Unom ka teams ang magtakus karon sa pagbukas sa 2nd Lucio Guy Lim Sr. Memorial Cup diha sa City Sports Club-Cebu gym sa Cebu Business Park.

Mga duwa karon

5:30 pm

Opening Ceremony

6:00 pm

Cebu Movers vs. Lite Shipping

8:00 pm

Mega Paints vs. FAL Shipping

Si Jonathan 'Niño' Imboy, apo ni Lucio Lim Sr., kinsa maoy mipabanhaw sa nahisgutang torneyo, nagkanayon nga ilang gibangon pag-usab ang torneyo aron paghandum sa namatay niyang apohan, kinsa mahiligon kaayo’g sports ilabi na sa   basketbol.

Una nilang gitukod ang maong liga lima na ka tuig ang milabay diin ang Big Boy Trucking maoy nahimong inaugural champion batok sa Cebu Movers System ni playing coach Dr. Boy Te, apan naputol ang maong torneyo pagka sunod tuig tungod kay walay makadala sa maong liga.

Ang mga teams nga mosalmot mao ang Cebu Movers System, Lite Shipping, FAL Shipping, Sunshine Machine shop, Mega Paints ug Aisle Marine Services.

Sa unom ka teams, ang upat niini pagalangkuban og mga regular employees gikan sa Lite Shipping, samtang ang laing duha mga guest teams, apan silang tanan gitugotan nga makakuha og import aron paghatag og bulok ug balanse sa duwa.

Ang torneyo mosubay og single round robin format diin ang top two teams mo-abante sa semifinals ug makabaton og twice-to-beat advantage. Samtang ang laing upat magtigi alang sa wild card round diin ang no. 3 makigsangka batok sa no. 6 ug ang no. 4 makigtakos batok sa no. 5 seed.

Ang modaog sa 3 vs. 6   match-up maoy makigsangka batok sa no. 1 seed sa semifinals, samtang ang modaog sa 4 vs. 5 nga engkwentro maoy makigharong sa no. 2 qualifier.

Ang modaog moabante sa best-of-three championship showdown.