Lancers mikaging sa Cobras

CEBU, Philippines - Mi-iskor og dakung upset sa Cebu  Schools Athletic Foundation Inc. (CESAFI) basketball event ang Southwestern University (SWU) Cobras sa dihang ilang gisarapan ang nine-time champion University of the Visayas (UV) Green Lancers, 52-51 atol sa pagsugod sa semifinal round niadtong Martes sa gabii diha sa Cebu Coliseum.

Ang split charities ni Clefford Maguate sa nahabiling 1.8 segundos maoy nakapadaog sa Cobras nga maoy unang koponan nga nakapukan sa Lancers niini nga season.

Dihang nagtabla ang iskor, 51-all, si Maguate mipahimutang sa free-throw line human makakubit og foul gikan ni Jerome Silva sa UV. Misipyat ang una niyang free throw, apan mipasud sa ikaduha aron paglikay sa posible untang overtime.

Pipila ka mga players sa SWU nga didto sa sulod sa korte, miligid sa sawog tungod sa tumang kalipay dihang ang guwardiya sa Lancers nga si Michael Abad napakyas pagpasulod sa iyang marka-bahala nga itsa gikan sa ubos sa midcourt.

Nahimong double black-eye ang nahimo ni Silva niadtong higayona dihang misipyat siya sa iyang duol nga turn-around jumper sa katapusang 10 segundos sa duwa. Human makuha sa SWU ang defensive rebound, si Arrd Evan Diango mihimo og kalit nga assist ngadto ni Maguate sa ilawom ug ang naulahi nakakubit og foul gikan ni Silva.

Si Diango mipakita sab sa iyang mabayanihong lihok dihang nakapasulod siya’g buzzer-beating triple sa katapusang 1:11 sa duwa human ang Lancers milabaw sa katapusang higayon, 49-48.

Ang Cobras ni coach Bong Begontes gipanitan og maayo sa Lancers sa eliminasyon diin gilubong kini'g 18 puntos, 57-75.

 “Nababa-an gyud nako. Sa praktis ingon ko nga bisa'g modaog lang tag one-point ok na. Kung mapilde man gani ta, dili nako gusto nga ilubong ta’g usab,” sumala pa ni Begontes.

Ang Lancers, kinsa mitapos sa elimination round uban ang 7-0 nga baraha, kinahanglan nga moharos sa katapusan nilang duha ka duwa batok sa University of Cebu (UC) Webmasters ug   sa University of San Carlos (USC) Warriors, tungod kay bisan og usa lang ka pilde, dili na sila maka-abante sa finals sa labing unang higayon sa siyam ka tuig nga kasaysayan sa CESAFI. 

Si Rene Pacquiao maoy nangulo sa Cobras sa iyang   23 puntos, samtang si Andrew Avillanoza mao sab ang nangu sa Lancers sa iyang 10 puntos.

Puntos Matag Usa

SWU (52) - Pacquiao 23, Pria 8, Ortuyo 7, Maguate 6, Diango 5, Litorja 2, Jalandoni 1

UV (51) - Avillanoza 10, Abad 9, Lao 8, Mercader 8, Cincoflroes 7, Silva 5, Saycon 2, Calo 2. – BANAT NEWS