Cuello mipahunong

CEBU, Philippines - Gipamatud-an ni WBC international minimumweight champion Denver Cuello nga andam na siya nga modominar sa 105 ug 108 lbs. division human niya gipahunong sa labing unang higayon ang beteranong si Mohamad Rachman sa Indonesia didto sa MSU IT Gym sa Iligan City.

Nakita dayun ang pabor sa kusog ug kapaspason sa batan-ong si Cuello human niya gihimong punching bag si Rachman ug gitapos ang away sa ikasiyam nga round human sa makusog nga right hook sa Pinoy ngadto sa ulo sa Indonesian.

Gikan didto wala na makabawi pa si Rachman kinsa nabangog pa sa kumo ni Cuello nga maoy nakaaghat ni referee Bruce McTavish nga ihunong duwa sa ikasiyam nga round alang sa technical knock-out nga kadaugan.

Sa maong kadaugan, si Cuello mipalambo sa iyang record ngadto sa 23-3-5, 13KOs, samtang si Rachman kinsa posibleng moretiro na human sa iyang kapildehan natagak sa record nga 62-9-5, 31KOs.

Sa iyang bahin, si Aljoe Jaro, ang manager ni Cuello nagkanayon nga human sa malampusong title defense sa  iyang batos, iya kining iparang ni WBC International 105 lbs. Interim champ Wanheng Minayothin sa Thailand sa dili pa niya kini isangka og world title fight. (BANATSPORTS)