USJ-R pabiling way pilde sa CESAFI volley event
CEBU, Philippines - Nagpabiling walay pilde ang reigning champion University of San Jose-Recoletos (USJ-R) human mikulit sa ikaupat nilang sunod-sunod nga daog pinaagi sa pagpilde sa Cebu Doctors' University (CDU) atol sa Cebu Schools Athletic Foundation Inc. (CESAFI) volleyball tournament kagahapon didto sa Aznar Coliseum.
Usa kadto ka yano nga kadaugan alang sa USJ-R ni Cebu Sports Hall of Famer coach Grace Antigua dihang ilang giseguro aron dili maka-iskor ang CDU bisa'g usa lang ka set pinaagi sa pagdominar sa tibuok duwa, 25-3, 25-18, 25-10.
Nangulo sa kadaugan sa USJ-R mao si Loujei Tipgos, Leoniel Sanchez, CHED National Games MVP ug Best Blocker, Jesriel Pino, Kevin Casia, James Lawas ug Jayvelle Rojas.
Sa laing bahin, ang University of Southern Philippines Foundation (USPF) mitangag sab og daog batok sa Cebu Institute of Technology-University (CIT-U) sud sa straight sets, 25-12, 25-21.
Ang kadaugan gipangulohan ni Edward Ybañez uban sa suporta nilang Joselito Moncada, Allan Caspillo, Marlon Luces ug Jonrey Opone.
Padayon sab nga mihakot og daog ang University of San Carlos (USC) human gipilde ang University of Cebu (UC), 25-20, 25-19, 25-23 kortesiya nilang Bonvie Estrera, Dennis Sepulveda, Ryan Mark Abut, Harvey Bernil, Robert Mendez ug rookie Ryan Fuentes.
- Latest
- Trending
