UV, CEC laraw sa semifinal berths

CEBU, Philippines - Tinguha sa nine-time champion University of the Visayas (UV) Green Lancers ug ang nagmangtas nga Cebu Eastern College (CEC) Dragons nga moangkon og automatic semifinal berths sa ilang pakigsangka batok sa tagsa-tagsa nilang kaatbang karong adlawa sa pagpadayon sa 10th Cebu Schools Athletic Foundation Inc. (CESAFI) basketball tournament diha sa Cebu Coliseum.

Ang UV Lancers moharong sa eight-seed University of Southern Philippines Foundation (USPF) Panthers sa main game sa alas-6 sa gabii human ang CEC Dragons makigbatok sa laing eight-seed University of San Jose-Recoletos (USJ-R) Baby Jaguars sa alas-4:30 sa hapon.

Ang UV Lancers ug CEC Dragons parehong nakabaton og "twice-to-beat" incentives.

Ang Lancers miluglog sa Panthers sa una nilang panagbagat sa eliminasyon sa iskor nga 67-59, samtang ang Dragons mitumba sa Baby Jaguars, 72-58.

 Ang Lancers midaog batok sa Panthers sa ilang panagbagat sa elimination round meeting, 67-59 ug nagtinguha nga usban ang nauwahi samtang ang Dragons milubong sa Baby Jaguars sa una nilang sangka sa iskor, 72-58.

Pabor ang Lancers batok sa Panthers sa tanang aspeto sa duwa ug mas daghan og opensiba nga ikabuga dili lang sa giladmon sa bench, apan sa ila sab nga gitas-on nga mahimong mobungkag sa bisan unsang matang sa depensa nga himuon sa ilang kaatbang.

Ang mga guwardiya nga sila si Harold Cincoflores, Eman Calo, Phil Mercader ug rookie John Paul Abad mas daku og bentaha kun itandi sa mga playmakers sa Panthers ug ingon man usab sa ilang mga shooters.

Gawas lang sa ilang consistent scorer nga si Fritz Dajalos, wala nay lain pang ikatugbang ang Panthers gawas lang og mangigo sila si Ellison Rivera.

Mahimo sab nga makatabang sa opensa sila si Dennis Earvin Ferrarin ug iyang manghod nga si James, apan ang dakung suliran atua manukad sa ilawom kun unsaon pagpiog nilang Armel Fuentes, Christian Tinoy, Mil Anthony Linao ug Lawrence Miguel Marano ang mga big men sa Lancers nga gilangkuban nilang Adrian Lao, Rene Jun Saycon, Andrew Avillanoza ug Jerome Silva.

Sa laing bahin, ang mga batan-ong Dragons sama kanila ni Nike Montalvo, Benjamin James Zosa, Roy Vincent Villarias, James Neil Sumayang ug Johnmar Lou Regidor mopakita na sab sa ilang abilidad batok sa pipila lang ka bitoon sa Baby Jaguars sama sa managsuong Renzo ug Rendell Senining ug Neriel Magdali.   – BANAT NEWS