MANILA, Philippines - Sa kanilang ikatlo at huling paghaharap ngayong season, ang isa ay matitira para sa susunod na bahagi ng torneo at ang isa naman ay uuwi na para magbakasyon.
Magsasagupa ang Ateneo at Far Eastern University sa isang knock out match para madetermina kung sino sa kanilang dalawa ang may karapatan na umusad sa semifinals ng ikalawang conference ng Shakey’s V-League Season ngayong araw sa ganap na alas-4 ng hapon sa The Arena sa San Juan.
Sa kasalukuyan, nagsasalo ang Lady Eagles at Lady Tamaraws sa ika-apat at ikalimang puwesto sa kanilang magkaparehong 6-6 panalo-talo na baraha.
Nabigo ang Katipunan-based spikers na maselyuhan ang ika-apat at huling tiket sa semis ng naturang liga noong Huwebes matapos maipilit ng mga taga-Morayta ang isang four set win, 25-21, 27-25, 11-25, 25-18 upang manatiling buhay ang tiyansa na umusad sa Final Four.