Lancers milaslas sa Cobras

CEBU, Philippines - Gilaslasan sa nine-time champion University of the Visayas (UV) Green Lancers ug wala kini kukaluoy nga milubong sa Southwestern University (SWU) Cobras, 75-57 niadtong Domingo sa 10th Cebu Schools Athletic Foundation, Inc. (CESAFI) diha sa Cebu Coliseum.

Gitapos sa Lancers ang elimination round   uban ang   ilang 7-0 nga baraha pinaagi sa yanong kadaugan batok sa Cobras, kinsa miposte'g 6-2 nga bentaha pagsugod sa first period.

Sama kakalit sa kilat, gibiyaan sa Lancers ang Cobras ginamit ang ilang taas nga por siyento nga outside shooting diin taudtaod gyud nilang wala pabawsa ang Cobras ug gitugotan lang nga mo-iskor og dos puntos gikan sa ilang paglabaw, 23-8 pabor sa Lancers.

Padayong nagpauwan og puntos ang Lancers ug ilang gilubong ang Cobras og 25 puntos, 37-12 sa wala pa taposa ang halftime, 41-23.

Nakapanimaho na og kadaugan ang Lancers kay padayon kining naglabaw og labing menos 20 puntos didto sa fourth period.

Ang Cobras hinay-hinay na nga miangkon sa ilang kapildihan dihang gipasulod na ni coach Bong Begontes ang iyang mga second stringers sa katapusang singko minutos sa duwa. Bugtong si Rene Pacquiao lang ang gipabilin ug maoy nagsagubang sa opensa aron pangulohan ang Cobras pinaagi sa iyang 22 puntos.

Ang laing duha ka Cobras nga sila si Clifford Maguate ug Ritchie Jalandoni wala makahuygo hinungdan nga nakabiya og maayo ang Lancers. Si Maguate igo lang mi-iskor og otso puntos, samtang si Jalandoni walay naaning puntos tungod sa grabeng depensa nga gipatuman sa Lancers.

Si Ralf Olivares maoy nangu sa Lancer sa iyang 17 puntos ug ang uban niyang teammates mura lang og nagduwa-duwa sa ilang mga kontra.

Ang Lancers nakig-uban karon sa University of Cebu (UC) Webmasters ug sa University of San Carlos (USC) Warriors nga parehong naghupot og "twice-to-beat" incentives sa quarterfinals.

Ang katapusang luna sa quarterfinals pagailogan sa Cobras   Cebu Institute of Technology-University (CIT-U) Wildcats nga nagkupot og managsamang 3-3 nga win-loss records.

Ang Cobras makiglayog sa Don Bosco Technology Center (DBTC) Greywolves, samtang ang Wildcats makighamag batok sa Webmasters karong Domingo sa katapusang adlaw sa eliminasyon.  (BANATSPORTS)