Mga protagonist mag-abot karon

CEBU, Philippines - Mga protagonista sa   "Philippines vs. The World" fight card nga sila si Rey 'Boom Boom' Bautista ug Milan 'Melinyo' Melindo magkita sa mga langyaw nilang kontra sa labing unang higayon sa press conference karong alas-11 sa buntag diha sa Coral Room sa Waterfront-Cebu City Hotel and Casino.

Ang kanhi WBO Inter-continental super bantamweight ug WBC featherweight champion nga si Bautista, makigsinukliay og kumo batok sa Mehikanong si Alejandro 'Zorrito' Barrera sa main event sa boxing card nga hinugpong gipasiugdahan sa ALA Boxing Promotions ug ABS-CBN Sports.

Sa laing bahin, ang reigning WBC Youth Intercontinental flyweight king nga si Melindo, mosugal sa iyang walay pildeng baraha batok sa OPBF ranked No. 4 flyweight gikan sa Korea nga si Jin-Man Jeon.

Gawas nilang Bautista ug Melindo, mopakita usab og aksiyon ibabaw sa ring si ex-OPBF super bantamweight ug WBO AsPac super featherweight titlist   Jimrex Jaca, kinsa makigsinumbagay ni kanhi WBC Latino super featherweight champion Pepito Cuevas Jr.

Angay sab nga atngan ang comeback fight ni kanhi IBF minimumweight king Florante Condes, kinsa makigbatok ni PABA interim title-holder Sofyan Effendi sa Indonesia.

Mokompleto sa undercard mao ang sangka ni Marlon Alta sa GenSan batok ni Naozumo Tsuchiyama sa Japan, Jun Intor batok ni Jaime Alin Jr. ug Wilbeth Loberanis batok ni Romulo Ebalang.