Greywolves lupig sa Wildkittens
CEBU, Philippines - Walay tihik-tihik nga depensa ug nagtuasik nga mga opensa maoy gihimong hinagiban sa tag-as nga Cebu Institute of Technology-University (CIT-U) Wildkittens paglubong sa Don Bosco Technology Center (DBTC) Junior Greywolves, 91-65 kagabii sa bugtong duwa sa secondary division sa 10th Cebu Schools Athletic Foundation Inc. (CESAFI) basketball event diha sa Cebu Coliseum.
Bisan og gilubong og 11 puntos, 25-34, nikayod lang gihapon ang Junior Greywolves aron makan-an ang labaw ngadto na lang sa kuwatro puntos, 43-47 sa nahabiling tres minutos sa third period.
Hinuon, ang abtik nga Wildkittens dali sab kaayong nakatubag sa ilang opensa aron inaton og balik ang ilang labaw ngadto sa 57-43 sa wala pa taposa ang third quarter.
Padayon ang kalbaryo sa Junior Greywolves sa final period ug gipahimuslan sab kini sa Wildkittens, kinsa mihansak og 24 puntos, 86-60 sa katapusang dos minutos sa duwa.
Ang power forward nga si John Lucerna mitama og 22 puntos alang sa kadaugan sa Wildkittens, kinsa mihipos na og duha ka daog sa lima ka duwa, samtang ang ilang biktima gihansakan og 0-5 nga baraha.
- Latest
- Trending
