Guadalupe nakatabla 1-1

CEBU, Philippines - Gipangulohan sa beteranong si Alex Cainglet ang barangay Guadalupe ug pungtanon silang misumbalik human mapilde sa series opener sa miaging semana alang sa best-of-series championship showdown diin mibugha siya’g 28 puntos batok sa topseed Inayawan aron mo-iskor og kulba-hinam nga kadaugan sa iskor,104-101 nga misangpot sa overtime ug mitabla sa serye atol sa Game 2 sa Mambaling Invitational basketball tournament- Conor Cup kaniadtong Biyernes sa gabii didto sa Mambaling Sports Complex.

Ang winner-take-all affair ( Game 3) tali sa Guadalupe ug Inayawan himoon ugmang adlawa sa alas 7:30 sa gabii diin ang mahimong kampiyon maoy makadawat sa unang ganti nga P12 thousand cash ug ang mapilde makadawat ug P8 thousand.

Aron maseguro nga matabla nila ang serye sa 1-1 nga baraha, si Cainglet mismo ang nangunay isip maoy point guard diin maayo niyang kapahimutang ang iyang mga teammates aron makatabang sa opensa. Kung kahinumdoman, ang Guadalupe miyukbo batok sa Inayawan sa Game 1 sa miaging semana sa iskor, 99-110.

Maayo sab kay nag-igo silang Wilson Gabucan ug si Abe Galinato aron mahimong instrumento sa ilang kadaugan pinaagi sa pagposa og 20 ug 17 puntos matag usa.

Sayo kaayong nanginit ang Guadalupe ug sila maoy naglabaw human sa first period, 27-25 nga ilang gi-inat ngadto sa 14 puntos nga labaw may usa ka minuto padulong sa halftime break, 46-32 pinaagi sab sa basket ni Cainglet.

Hinoon, wala sab mo-surrender ang Inayawan ug hinay-hinay silang mibangon gikan sa lawon nga paghinanok ug milampos pagsakmit sa liderato sa iskor, 64-63 didto sa third period pinaagi sa basket ni ex-CIT Wildcat Joseph Guangco kinsa mao sab ang nangu sa opensa sa Inayawan sa iyang 28 puntos.

Gikan niadtong tungora, nagpuli-puli og labaw ang duha ka habig didto sa fourth period diin tres puntos lang ang pinakadakong labaw nga nahimo tali kanila sulod sa 10 minutos. Posible untang maharus sa Inayawan sa 2-0 ang serye apan wala mosulod ang dinali-dali nga pektos ni Toroy Huybia sa kataposang tres minutos sa regulation ug ang iskor parehong 88 human sa basket ni Galinato, sa may 24 segundos pa ang nahibiling oras.

Sikit gihappon kaayo ang duwa sa five-minute extension ug sa laing higayon, giusikan sab sa Inawayan ang lahing higayon nga modaog dihang biya sila og usa ka punto, 101-102 ug wala nila hingpit makuha ang kataposang ball possession dihang nihaplot ang bola gikan sa kamot ni Guangco sa kataposang 6.3 segundos ug napugos siya’g foul ni Gabucan kinsa kalmado kaayong mipasulod sa iyang duha ka free throws alang sa 104-101 nga kadaogan ug wala sab mosulod ang kataposang attempt sa Inayawan gikan sa three-point aron unta dad-on ang duwa sa laing overtime.

Ang topgunner sa Inayawan nga si Robert Abasolo, ang sentro nga si Baltazar Jueves ug ang offguard nga si Yester Daculan nauwahi og abot ug kanilang tulo, si Abasolo lang maoy nanginit.

Si Guangco giabagan ni Allain Abellanosa kinsa mibahug og 26 puntos, si Abasolo midugang og 15 puntos ug si Huybiar may 13 puntos alang sa mga batos ni coach Doods Villareal.

Sa sayo pa, si Vergel Abelong mipabuto og 30 puntos aron pangulohan ang Pardo Selection ngadto sa 82-78 nga kadaugan batok sa mas batan-ong Ave Maria Sanctuary Park sa usa ka exhibition.

Puntos matag usa:

Pardo Selection (82) — Abelong 30, Bonie 17, Montederamos 15, Eroy 8, Tulda 4, Tabuco 4, Castanares 2, Abellana 1

Ave Maria (78) — Marquez 19, Ebarola 18, Saramosing 14, Bono 7, Escatron 4, Sanchez 3, Perez 3, Gavilan 2, Cajutoy 2, Tiong 2

Second Game:

Guadalupe (104)— Cainglet 28, Gabucan 20, Cosido 20, Galinato 17, Lopena 7, Gacho 4, Minoza 4, Almonte 4

Inayawan (101)— Guangco 28, Abellanosa 26, Abasolo 15, Huybiar 13, Baguio 6, Bacalso 2, Cabrera 2, Daculan 1  (BANAT)