Warriors midaog na sab

CEBU, Philippines - Ang three-point artist nga si Michael Cantonao mibahug ug walo ka three-pointers sa iyang 27 puntos aron pangulohan ang undermanned University of San Carlos (USC) Warriors ngadto sa 104-78 nga kadaugan batok sa Cebu Institute of Technology-University (CIT-U) Wildcats niadtong Huwebes sa bugtong sangka sa collegiate division sa nagpadayong 10th Cebu Schools Athletic Foundation, Inc. (CESAFI) didto sa Cebu Coliseum.

Mga duwa karon: (Cebu Coliseum)

1 pm CIT-U vs. CEC (Jrs.)

2:30 pm USPF vs. SHS-Ateneo de Cebu (Jrs.)

4 pm USC vs. USP-F (Srs.)

5:30 pm SWU vs. CIT-U

Wala kapugngi ang pagmangtas ni Cantonao ug tungod sa iyang kainit, siya maoy nangu sa usa ka walay puas nga tinuhogay sa net ug mobawos lang sa makadiyot sang Wildcats kinsa sa fourth period diin gilubong sila’g taga-liog sa Warriors ug 35 puntos, 78-43 human sa basket ni Robert Gines Codilla. Buot untang suwayan pagpakgang sa Wildcats ang pagbahis sa ilang kaatbang apan bisan pa sa pagbalik sa ilang leading scorer nga si Chester Curso gikan sa one-game suspension, igo lang natibhangan og gamay ang ilang biya.

Si Curso maoy nangu sa Wildcats sa iyang 29 puntos, labaw og dos puntos sa nakuha ni Cantonao.

Sa lain na sab nga higayon, migamit ang Warriors sa ilang maayong teamwork ug bisan pa og walo lang ka players ang anaa sa ilang line-up, mas determinado kaayo silang modaug ug unom sa ilang players ang miposa ug double figures pinangulohan ni Cantonao.

Ang Warriors ug ang Wildcats kinsa nagtabla karon sa ikaduhang pwesto sa parehong 3-2 nga baraha, mahimong magpabilin gihapon sa ikaduhang luna sa higayon nga modaug sila karong gabii batok sa tagsa-tagsa nila ka kaatbang—ang Warriors makig sangka batok sa walay daug nga USP-F Panthers samtang ang Wildcats makigharing batok sa lig-on sab nga SWU Cobras.

Si Joven Cid Cortes midugang ug 17 puntos alang sa Warriors samtang sila si Sam Hermosa ug Codilla parehong mitampo og 15 puntos ug sila si Nilton John Otida ug Mark Gil Panerio mi-iskor ug 12 ug 11 puntos, matag usa.

Tungod sa ilang papel isip mga point guards, sila si Mico Santos ug Chino Uy wala mo-iskor og double figures apan dako ug natampo ang ilang mga assists nga susama ka kamahinungdanon sa puntos sa uban nilang teammates.

Nagpakita og katakos ang rookie nga si Allan Dimco ug mibahug og 17 puntos alang sa Wildcats apan wala makahuygo ug napugngan sila si Arnel Ipang ug Floyd Taboada kinsa maayo kaayong nakaduwa dihang midaug sila batok sa USJR Jaguars kaniadtong Agosto 14 diin naka-ipsot sila sa iskor, 94-92. Sila si Ipang ug Taboada nga pulos moigo sa gawas, igo lang nakamaneho og nuybe puntos matag usa.

Puntos matag usa:

USC (Srs.) 104— Cantonao 27, Cortes 17, Hermosa 15, Codilla 15, Otida 12, Panerio 11, Santos 5, Uy 2

CIT-U (Srs.) 78— Curso 29, Dimco 17, Ipang 9, Taboada 9, Dela Cerna 8, Batiquin 4, Cabanero 2. – BANAT NEWS