Cobras gipanitan

CEBU, Philippines - Gipakuratan sa undermanned University of San Carlos (USC) Warriors ang Southwestern University (SWU) Cobras pinaagi sa pagkulit og 16 puntos nga kadaugan, 72-56, samtang ang University of Cebu (UC) Webmasters mikulit sa ilang ikaupat nga sunod-sunod nga daog dihang ilang gipukan ang Don Bosco Technology Center (DBTC) Greywolves, 88-77 niadtong Domingo sa 10th Cebu Schools Athletic Foundation, Inc. (CESAFI) diha sa Cebu Coliseum.

Sa mga sangka sa high school division, ang Cebu Eastern College (CEC) Dragons milubong sa USC Baby Warriors, 88-68 aron moposte og 3-1 nga baraha, samtang ang UC Junior Webmasters naka-eskapo bitbit ang 69-67 nga kadaugan batok sa University of San Jose-Recoletos (USJ-R) Baby Jaguars.

Mga duwa karon (Cebu Coliseum)

4:30 pm UC vs. DBTC (Jrs.)

6:00 pm CIT vs. DBTC (Srs.)

Ang kasaligang shooter nga si Michael Cantonao mi-iskor og 16 puntos ug ang sentro niining si Joven Cid Cortes midugang og 13 puntos alang sa Warriors, kinsa milupig sa rebounding sa Cobras, 44-21 ug nagtabla na karon uban sa ilang biktima sa managsamang 2-2 win-loss records.

Ang point guard nga si   Nilton John Otida miamot og 12 puntos ug Sam Hermosa mitampo og 10 puntos alang sa Warriors kansang depensa maoy nakaguba sa shooting form sa Cobras aron dili kini makahuygo og maayo ug ingon man dili makakuha og second-chance points.

Wala sab hatagi’g higayon sa Warriors nga makahuygo ang duha ka big men sa Cobras nga sila si Clifford Maguate ug Ritchie Jalandoni, kinsa igo lang nagkumboya og 16 puntos. Ang nakaparat kay wala pa gyud makaduwa ang ilang ace point guard nga si Arrd Diango tungod kay nagpa-alim pa sa iyang piang sa walang abaga.

Bugtong si Eleazar Armecin   ang miposte og double figures alang sa Cobras sa iyang 18 puntos.

Samtang nagkaupos ang oras, nag-anam sab og pangigo ang Warriors aron modistansiya og maayo.

Sa laing bahin, ang 6-foot-9 nga si Junemar Fajardo mikimada og 17 puntos aron pangulohan ang Webmasters, samtang si Gerald Ampoon midugang og 15 puntos. Sila si Kelvin Juliane ug rookie Erden Glen Magallanes miantog og 12 puntos matag usa.

Ang 1-3 nga Greywolves gipangulohan nilang Clarito Hernando Jr. ug Jefford Aldave nga nagkumboya og 26 puntos.

Si Benjamin James Zosa maoy nangu sa Dragons sa iyang 21 puntos ug si Francis Dave Guardario mi-iskor og 20 puntos alang sa pilderong Baby Warriors.

Ang Junior Webmasters gipangulohan ni Alvin Labolabo Jr. sa iyang 15 puntos, samtang walay daug-daog nga Baby Jaguars gipangulohan ni Julius dela Cerna Jr. pinaagi sa iyang 25 puntos.

Puntos Matag Usa

Unang duwa:

UC (88) - Fajardo 17, Ampoon 15, Juliane 12, Magallanes 12, Mohammad 7, Batua 6, Cabrera 6, Tan 5, Pao 4, Cueva 2, Enriquez 2

DBTC (77) - Hernando 14, Aldave 12, Castro 9, Geraga 7, Puebla 6, Echavez 5, Dela Rama 4, Cinco 3, Desucatan 2, Cortes 2, Bonjie 2

Ikaduhang duwa:

USC (72) - Cantonao 16, Cortes 13, Otida 12, Hermosa 10, Panerio 9, Codilla 6, Uy 3, Santos 3

SWU (56) - Armecin 18, Maguate 9, Jalandoni 7, Wagas 7, Litorja 6, Ortuyo 4, Pacquiao 3, Dadang 2  (BANAT NEWS)