Langyaw'ng runners moapil sa Pilipinas 25K Run
CEBU, Philippines - Unom ka mga langyaw'ng runners ug 80 ka mga tang-ang Pinoy runners ang kompirmadong mag-ilog sa titulo sa Pilipinas 25K International Marathon karong Domingo diha sa Asia Town IT Park sa Brgy. Apas, ning siyudad.
Si Angel dela Merced, ang Ads Promo manager sa IPI, mao mismo ang mipahibalo atol sa final press conference sa miaging gabii diha sa Sports Exchange Bar and Grill.
"Naay mga international based runners nga sure na nga managan karong Domingo, kadaghanan nila gikan sa Asia," matud ni Dela Merced.
Lakip sa unom ka mga langyaw'ng runners mao ang usa ka Australian ug Kenyan nationals nga mohagit sa local runners ning PATAFA-sanctioned nga lumba. Apan ang mga sakop sa National team gidid-an sa pagsalmot sa lumba kay si PATAFA president Go Teng Kok di gusto nga marisgo ang mga atleta sa ilang pagpangandam sa Asian Games karong Nobiyembre 12-27 didto sa Guangzhou, China.
Sa laing bahin, kapin sa usa ka libo ug laing 700 runners ang modagan ubos sa 5K ug 10K run.
Si Pinoy Big Brother first runner up Paul Jake Castillo modagan sab ubos sa 5K uban sa pipila ka mga celebrity friends.
Ganting salapi, medalya ug gift certificates ang maangkon sa top runners sa maong lumba. – BANAT NEWS
- Latest
- Trending
