CEBU, Philippines - Wala kapahimusli ang tournament-high 48 puntos ni Alan Sepe sa Yellow team kay napilde kini batok sa Violet team, 97-99 sa nagpadayong aksiyon sa Phase 3 Camella Homes Sunday Club basketball tournament diha sa Villas Magallanes gym sa dakbayan sa Lapu-Lapu.
Sa laing duwa, ang Ryle Trucking yano kaayong mihakot og daog pinaagi sa paglubong sa Rollway Freighters sa iskor nga 99-81.
Nabahin ang iskor sa Violet team diin lima ka players nga gipangulohan ni Alex Balberona ang mialsa og double figures. Si Balberona milansang og 22 puntos.
Nakakuha sab siya og dakung suporta gikan ni Centes Brañanola, kinsa miabuno og 21 puntos, gisundan ni Dodong Aparente sa iyang 18 puntos, samtang sila si Bebot Pleños ug Rolly dela Pieza nagkumboya'g 26 puntos.
Gawas ni Sepe, laing upat niya ka teammate ang mirehistro sab og double figures. Sila si Roylan Sumilang ug Rick Rabi parehong adunay tag-12 puntos, si Ruben Martas mipupo og 11 puntos, samtang si Jun Geraldez miani og 10 puntos.
Sa laing aksiyon, sila si Wendel delos Angeles ug Centes Brañanola mibira og 16 puntos matag usa aron pangulohan ang Ryle Trucking, samtang ang pilderong Rollway Freighters, gipangulohan sab ni Allen Dinola, kinsa mi-iskor og 20 puntos, gisundan nilang Raymund Regala, Jessie Salinas ug Jenkin Olloves nga mihakot og 14 puntos matag usa.
Puntos Matag Usa
Unang duwa:
VIOLET (99) - Balberona 22, Brañanola 21, Aparente 18, Pleños 14, R. Dela Pieza 12, Cortes 6, Almacin 6
YELLOW (97) - Sepe 48, Sumilang 12, Rabi 12, Maratas 11, Geraldez 10, Villapez 4
Ikaduhang duwa:
RYLE TRUCKING (99) - Delos Angeles 16, Brañanola 16, Oyanib 12, Palad 8, Sanchez 8, Catampatan 6, Ando 6, R. Dela Pieza 6, Delan 5, Flores 4, Bohol 4, R. Dela Pieza 4, Delgado 4
ROLLWAY FREIGHTERS (81) - Dinola 20, Regala 14, Salinas 14, Olloves 14, Abel 10, Omega 4, Padilla 3, Lalaguna 2. – BANAT NEWS