Simpolang solo leader sa fya, 2-0

CEBU, Philippines - Gi-asal sa Simpolang Barbecue Haus ang ilang kaatbang nga Angelica team pinaagi sa pag-iskor og 101-91 victory nga kadaugan aron pagsakmit sa solong liderato sa ilang 2-0 nga baraha atol sa nagpadayong 2nd season sa F. Llamas Youth Association (FYA) basketball tournament didto sa Vicente Sotto Memorial Gym sa barangay Punta Princesa, ning dakbayan.

Sa sayo pa, gimakmak sa CRV ang Kharos team sa iskor, 106-80.

Karong Huwebes, ang Simpolang pinangulohan ni skipper Noel Medalle, nagtinguha sa ilang ikatulong sagunson nga kadaugan dihang ilang ikasangka ang 1-0 CRV ug ugmang adlawa, ila sab ikasangka ang 1-0 Viking Haulers, ang team diin nagduwa ang iyang manghud nga si Baeng nga kanhi point guard sa USJR Baby Jaguars.

Sila si Medalle ug Nico Laborte maoy nangu sa Simpolang pinaagi sa ilang 19 puntos matag usa ug balanse sab ang scoring sa ilang kauban nga naglakip kanilang Botoy Tabares sa iyang 18 puntos, si Ryan Villaver midugang og 16 puntos ug si Poloy Aglipa miposa ug 14 puntos.

Si Kenneth Tabada mibahug og 26 puntos aron pangulohan ang Angelica samtang sila si Paul Basalo, team owner Michael Garcia ug Ranel Patalita pulso sab miamot ug double figures—si Basalo may 16 puntos, Garcia may 13 puntos ug Patalita may 11 puntos.

Sa laing bahin, mi-iskor og 17 ug 16 puntos sila si Dondon Cadungog ug Rovel Tabar aron pangulohan ang opensa sa CRV samtang sila si JR Laurente ug Janus Abellana nagkumboya og 25 puntos.

Si PJ Cabansay maoy nangu sa Kharos human siya mokadlit og 25 puntos ug si Wako Dacayana midugang og 13 puntos.

Ang torneyo sa FYA gipaluyohan nilang tournament director Boogie Atillo ug konsehal Ray Gabriel Salgado sa Punta Princesa.

Sa FYA 12 years under tournament, ang team Janeth naka-ipsot batok sa Tessa Marie sa iskor, 31-29. (FREEMAN)