Yellow, Rollway Freighters midaog na sab

CEBU, Philippines - Mikugi na sab og pamupo og mga puntos si Amay Palad aron pangulohan ang Yellow team pagpukan sa Violet team, 85-75 sa Phase 3 Camella Homes Sunday Club basketball tournament diha sa Villa Magallanes gym sa Lapu-Lapu City.

Si Palad, kinsa wala kapugngi sa iyang kamangtas milansang og 24 puntos, samtang si Alan Sepe midokdok og 19 puntos. Sila si Roylan Sumilang ug Jun Geraldez nagkumboya'g 24 puntos alang sa maong kadaugan.

Sa gihapon, si Centes Brañanola mao ang nangulo sa Violet nga misilsil og 16 puntos, gisundan ni Leo Almacin nga adunay 14 puntos ug Alix Belberona nga mikimada og 11 puntos. Si team owner Rolly dela Pieza ug Bebot Pleños parehong mihirit og 10 puntos sa maong kapildihan.

Sa laing duwa, ang Rollway Freighters mibuntog sa Ryle Trucking, 108-102.

Lima ka players sa Rollway ang mipaksit og double figures nga gipangulohan ni Ocon pinaagi sa iyang 26 puntos.

Samtang ang naabiriyang Ryle Trucking gipangulohan ni Brañanola nga adunay 16 puntos.

Puntos Matag Usa

Unang duwa:

YELLOW (85) - Palad 24, Sepe 19, Sumilang 14, Geraldez 10, Villapez 6, Maratas 6, Rabi 6

VIOLET (75) - Brañanola 16, Almacin 14, Balberona 11, R. dela Pieza 10, Pleños 10, D. dela Pieza 6, Tongol 6, Aparente 2

Ikaduhang duwa:

ROLLWAY (108) - Ocon 26, Albeos 22, Micabalo 17, Dinola 14, Abel 10, Andrino 7, Salinas 6, Regala 4, D. dela Pieza 2

RYLE TRUCK (102) - Brañanola 16, Oyaneb 15, Delos Angeles 13, A. Palad 12, Sanchez 9, Regner 8, J. Palad 6, Delgado 5, Flores 4, Delan 4, E. dela Pieza 4, Catampatan 4, Ando 2. - BANAT NEWS