Karon nang gabii binukbukay sa Sibonga

CEBU, Philippines - Karong gabii, gipaabot nga maghaguros ang mga kinumo didto sa Sibonga nunot sa pagpahigayon sa 3rd leg sa Leonil Bacaltos Cup Amateur Boxing Tournament diha sa Bonifacio Bacaltos Sports and Cultural Centrum sa Sibonga sa habagatang Sugbu.

Si superflyweight prospect Marco Demecillo Singwangcha sa Cebu City makigsinukliay og kumo batok ni Joash Aparecion sa Cagayan de Oro sa main event nga gikatakda sa 10 ka hugna.

Ang boksidor ni Thai promoter Naris Singwangcha nga si Demecillo Singwangcha, kinsa adunay undefeated record nga 7-0, laraw nga mokulit sa iyang ikaupat nga knockout nga kadaugan batok ni Aparecion.

Si Singwangcha giatiman usab ni Rex Wakee Salud.

Ang stablemate ni Marco nga si Jestoni Pepito Singwangcha moharong usab ni Alvin Maquiling sa supporting main event ubos sa super bantamweight.

Sa undercard, ang bantamweights nga sila si Marvin Tampus sa Bato, Leyte ug Sugbuanong si Aljon Salugaol magsangka sud sa walo ka hugna, samtang si Rex Tito Singwangcha makigsinukliay og kumo ni Jerome Bontog sa Phil-Aust Gym sa Mandaue.

Laing Phil-Aust gym fighter nga si JR Salvador makigbinakbakay usab batok ni Elmer Pono sa TI Yamagata Gym ug ang super flyweight Jerome Casas makigpinaksitay usab batok ni Jomar Torion. - BANAT NEWS