CEBU, Philippines - Gipangunayan ni UTASSCO Utility team owner Atty. Flor Yosores ang opensa diin miantog kini'g 19 puntos lakip ang crucial three-pointer batok sa Park ‘N Go Bakeshop, 82-77 aron sakmiton ang korona sa Power Forty Commissioner’s Cup niadtong Martes sa gabii diha sa Inayawan Sports Complex.
Misikit ang Park N' Go, 72-74 sa final period, apan si Yosores mibuhi og usa ka triple sa himalatyong oras aron dili mameligro ang UTASSCO nga miabante og singko puntos, 77-72.
Sa tuyo nga maangkon ang daog, ang UTASSCO mipatuman og hugot nga depensa ngadto sa Park N' Go Bakeshop nga wala na kasikit og balik sukad niadto.
Si Alex Mercado miabuno'g 28 puntos ug sila si Wilbur Cabrera ug Sammy Atillo mitampo'g 14 ug 12 puntos matag usa.
Isip kampiyon, ang UTASSCO modawat og P5,000 nga ganting salapi, samtang ang Park ‘N Go gantihan og P4,000. Sa sayo pa, ang F&E Electrical Supplies mibuntog sa Precious Ellah, 98-94 aron pagsakmit sa ikatulong puwesto. Si Mario Tabar maoy nangu sa F&E Electrical Supplies nga mipabuto'g 38 puntos, samtang si Rusty Caballero mibahog og 40 puntos alang sa pilderong Precious Ellah.
Matud pa ni commissioner Edwin Dejacto ang awarding ceremony himuon karong Sabado nga tukma sab sa anibersaryo sa Power Forty diha sa Inayawan Sports Complex
Puntos Matag Usa
Unang duwa:
F& E Electrical (98) -Tabar 38, Cabatas 18, Abasolo 15, Mosqueda 14, Pacquiao 9, Navares 2, Kalinga 2
Precious Ellah (94) - Caballero 40, Traya 16, Javierto 15, Cabañero 7, Nacario 7, Navares 6, Ramil 3
Ikaduhang duwa:
UTASSCO (82) - Yosores 19, Mercado 18, Cabrera 14, Atillo 11, Abasolo 5, Pestaño 4, Nacional 4, Yu 3, Alob 2, Labajo 2
Park ‘N Go (77) - Arias 29, Layon 17, Ozon 12, Rama 9, Echavez 8, Dejarme 2. – BANAT NEWS