Bag-ong game format sa CESAFI
CEBU, Philippines - Bag-ong mga kausaban sa game format ang ipatuman sa 10th Cebu Schools Athletic Foundation Inc. (CESAFI) nga mosikad karong Hulyo 31 diha sa Cebu Coliseum.
Apan matud pa ni CESAFI Commissioner Felix 'Boy' Tiukinhoy Jr. nga ang bag-ong format magamit lang sa basketball event.
Ubos sa bag-ong lagda, ang top-ranked teams dili na makapahimulos og "twice-to-beat" incentives atol sa semifinal round. Inay, ang top four teams moduwa og laing single round robin diin ang nag-unang duha ka koponan ang magsambunot sa kampiyonato.
"We made this kind of change in order to give the teams a tougher and much more exciting competition that would surely be a great challenge to the consistent top performers," matud ni Tiukinhoy.
Gawas niining mga kausaban, ang CESAFI mobag-o sab sa mga lista sa tournament managers sa ubang mga events.
Gihinganlan ni Tiukinhoy ang duha ka events -- volleyball ug football nga nakita niya nga wala kaayo maayong pagkadumala sa miaging tuig.
Nahinabi na ni Tiukinhoy si Cebu Volleyball Association (CEVA) president Jun San Juan ug si kanhi Cebu Football Association head Jonathan 'Maxi' Maximo aron sa pagdumala sa tagsa-tagsa ka events ning tuiga ug nakakuha og positive feedbacks gikan sa duha.
Kahinumduman, ang volleyball tournament nahimong "controversial" event sa miaging tuig diin tulo ka coaches ang gipahamtangan og "lifetime" banned sa CESAFI. – BANAT NEWS
- Latest
- Trending
