Chavez Jr. midaog, Cotto isunod?

CEBU, Philippines - Isip anak sa giilang legendary Mexican boxer, gipamatud-an ni middleweight Julio Cesar Chavez Jr. ang iyang ka maayong laki human niya gikulata ang Irish brawler nga si John Duddy pinaagi sa unanimous decision kagahapon didto sa Alamodome sa San Antonio.

Si Chavez Jr. kinsa pabiling undefeated sud sa 41 niini ka away misakmit usab sa bakanteng WBC silver middleweight title.

Mipatigbabaw sa tanang round ang Mehikano gamit ang iyang mahait nga jab ug hooks nga pulos miigo sa ulo ug lawas ni Duddy, apan mipakita sa iyang kalig-on ang Irish kinsa milahutay gyud hangtud sa 12 round bisan paman sa grabeng kastigo nga nadawat niini.

“John is the toughest fighter I’ve faced so far. He kept the pressure on and really pushed me farther than I’ve been to this point in my career. But I knew coming in that he was going to be challenging, and I was happy to walk away with the victory”, matud pa ni Chavez.

Human sa away, numero unong gipasalamatan ni Chavez Jr. mao ang bag-o niyang training staff nga gipangulohan sa four-time trainer of the year nga si Freddie Roach uban ang conditioning coach nga si Alex Ariza kinsa pulos yawi sa kalampusan ni WBO welterweight champion Manny Pacquiao.

Si Top Rank Inc. bigboss Bob Arum nagkanayon usab nga tungod sa impresibong kadaugan ni Chavez Jr., gitan-aw niya karon ang posibilidad nga iparang kini batok ni WBA champion Miguel Cotto.

Sa laing bahin, nag-malampuson usab ang come-back fight ni former three-division world champion Marco Antonio Barrera kinsa midaog pinaagi sa unanimous decision batok ni Adaiton De Jesus. Lemuel P. Maglinte gikan sa AP