CEBU, Philippines - Miantog og 31 puntos si Wilbor Cabrera ug laing high-scoring performances nilang team manager Atty. Flor Yosores ug Alex Mercado maoy naghatod sa UTASSCO Utility ngadto sa 120-94 nga kadaugan batok sa Precious Ellah sa nagpadayong elimination round sa Power Forty Summer League didto sa Inayawan Sports Complex.
Tungod sa maong kadaugan, pabiling walay pilde ang UTASSCO bitbit ang limpiyong 4-0 nga baraha, samtang ang Precious Ellah nagbitbit og 2-2 nga baraha.
Si Atty. Yosores miburak og 24 puntos, samtang si Mercado mitusak og 23 puntos aron paglubong sa Precious Ellah og 26 puntos.
Ang Precious Ellah gipangulohan ni Nestor Javierto, kinsa mikadlit og 26 puntos, gisundan nilang Eric Cabañero ug Roel Traya nga mi-iskor og 23 puntos matag usa.
Sa laing duwa, gipatapsingan sa F&E Electrical Supplies ang Water Market, 99-98, samtang ang Park ‘N Go Bakeshop mihaon og daog batok sa Allyn & Sons, 101-92.
Nahimutang karon sa triple tie ang Precious Ellah, Park ‘N Go ug F&E Electrical Supplies sa ilang 2-2 nga baraha, samtang ang Water Market ug Allyn & Sons nahagsa sa kinailawman sa managsama nilang 1-3 records.
Si Michael Arias mihakot og 27 puntos ug si Melvin Layon midugang og 20 puntos aron pangulohan ang Park ‘N Go. Si Carding Vernaiz mibagdok og 50 puntos alang sa Allyn & Sons.
Si Inayawan barangay councilor Mario Tabar mi-iskor og 23 puntos, samtang si Roger Cabatas miposa og 21 puntos aron pangulohan ang F&E Electrical Supplies.
Ang Water Market gipangulohan ni Vez Eleguin, kinsa mihipos og 27 puntos.
Puntos Matag Usa
Unang duwa:
Park ‘N Go (101) - Arias 27, Layon 20, Echavez 12, Dejarme 12, R. Rama 8, Demitiman 6, G. Rama 6, Ozon 6, Lalican 4
Allyn & Sons (92) - Vernaiz 50, Tabar 20, Colinares 7, Albaño 5, Moniva 4, Sabejon 2, Gabuya 2, Cabase 2
Ikaduhang duwa:
F&E Electrical (99) - Tabar 23, Cabatas 21, Abasolo 12, Navares 5, Pacquiao 5, Labajo 2, Kalinga 2
Water Market (98) - Eleguin 27, Dela Rama 20, Labalan 19, Dejacto 13, Genzon 10, Abellana 5, Dacalos 4
Ikatulong duwa:
UTASSCO (120) - Cabrera 31, Yosores 24, Mercado 23, Labajo 8, Atillo 8, Abasolo 8, Yu 2
Precious Ellah (94) - Javierto 26, Cabañero 23, Traya 23, Navares 11, Abadejos 8, Ramil 3. – BANAT NEWS