AJY-Bong mimakmak sa Virlex sa LLBA Rollway Cup

CEBU, Philippines - Nainat ngadto sa 5-3 ang baraha sa AJY-Bong human nila gipilde ang Virlex, 71-61 sa nagkainit nga aksiyon sa LLBA Rollway Cup 2010 basketball tournament niadtong miaging gabii didto sa Villa Magallanes gym sa Lapu-Lapu City.

Sila si Celso Igot ug Allan Yu nagkumboya og 36 puntos aron pangulohan ang AJY-Bong. Si Igot mipupo og 19 puntos, samtang si Yu miani og 17 puntos. Ang 6-foot-2 nilang sentro nga si Jack Soler mitampo lang og sayes puntos sa kadaugan.

Ang pilderong Virlex gipangulohan ni Pompie Ngujo pinaagi sa iyang 25 puntos, gisundan ni Alex Dignos nga adunay 13 puntos ug Jun Pardillo nga miabuno'g 12 puntos.

Sa laing duwa, ang Rollway Custom Brokerage ni Rolly dela Pieza mikulit sab og daog batok sa RoRo-Leo Auto Shop, 78-74.

Tulo ka players ang mirehistro og double figures alang sa Rollway nga gipangulohan ni Jovan Tubo, kinsa miburak og 20 puntos. Samtang ang RoRo-Leo Auto Shop gipangulohan sab ni Arnel Patalinghug sa iyang 24 puntos ug si Allan Sepe miabuno'g 13 puntos.

Midaog sab ang VKK batok sa Puyat Steel sa iskor nga 67-59. Sila si Rene Cuadra ug Ugsimar parehong mibahog og 19 puntos aron pangulohan ang VKK. Si Bong Juntilla mitampo'g 13 puntos ug si Victor Malingin misansan og 10 puntos.

Si Neil Belga mao lang ang bugtong nakakuha'g double figures alang sa Puyat Steel pinaagi sa iyang 11 puntos. – BANAT NEWS