Ave Maria-USJR hawod sa 21-under

CEBU, Philippines - Managsuong Renzo ug Rendell Senining maoy nangulo sa Ave Maria Sanctuary Park-University of San Jose-Recoletos (USJ-R) Baby Jaguars ngadto sa impresibong 62-49 nga kadaugan batok sa University of San Carlos (USC) Baby Warriors aron sakmiton ang korona sa 21-year under category sa Talamban basketball tournament didto sa Talamban Sports Complex.

Si Rendell, ang kinamanghoran sa tulo ka managsoong Senining, mi-iskor la'g dos puntos sa second half, apan siya ug si Clint Muñez nakahimo gihapon sa pagpangulo sa opensiba alang sa Baby Jaguars nga parehong mibugha og 12 puntos, samtang ang iyang maguwang nga si Renzo miamot og siyete puntos.

Sayo kaayong gikontrolar sa Baby Jaguars ang duwa diin miposte kini'g 22-6 nga bentaha ug wala na kini molingi pa sukad niadto aron paglansang og 19 puntos

nga labaw sa third period, 45-26.

Si Lorenzo Bacaltos mao lamang ang bugtong Baby Warriors nga nakahimo'g double figures sa iyang 10 puntos.

Sa sayo pa, ang barangay Apas nga gipangulohan ni ex-commercial player nga si Toto Lawas milubong sab sa host Talamban Selection nga gipangulohan ni Rico Archival sa iskor nga 82-62 aron pagsakmit sa korona sa 40-above category.

Puntos Matag Usa

Ave Maria/USJ-R (62) - R. Senining 12, Muñez 12, Autentico 9, Sanchez 8, Rz Senining 7, Ebarola 4, Saramosing 2, Santos 2, Espiritu 2, Escatron 1, Heredia 1

USC Jrs. (49) - Bacaltos 10, Uy 9, Palapar 8, Pajantoy 7, Romaguera 6, Guardiario 4, Malana 2, Bongo 1. – BANAT NEWS