Barakos vs. Air21

CEBU, Philippines - Ang Air21 Express ug Barako Coffee Energy Masters, duha ka koponan nga nagkumbitay karon sa standing mosuway karon pagsakmit og daog aron makakuha og luna sa playoffs sa PBA Fiesta Cup didto sa Ninoy Aquino Stadium.

Nahimutang sa ubos sa standing bitbit ang ilang 2-11 win-loss record, ang Barakos makigsangka sa Alaska sa alas-5 sa hapon, samtang ang Air21 mosuway pagpukan sa Coca-Cola sa alas-7:30 sa gabii.

Human sa sakit nilang kapildehan batok sa Coca-Cola niadtong Domingo sa overtime, 105-100, kinahanglan karon nga mudaog ang Barakos nila ni Leo Najorda, Rob Wainwright ug import Sammy Monroe batok sa Alaska.

Sa laing bahin, bug-at nga responsibilidad ang pas-anon karon ni LeRoy Hickerson kinsa mao ang bag-ong import nga gikuha sa Air21.

Ang kanhi draftee sa Memphis Grizzlies nga si Hickerson mosuway karon og tuboy sa Air21 ngadto sa kadaugan batok sa Coca-Cola nga gipangulohan usab sa beteranong import nga si Rashad Bell. – BANAT NEWS