CEBU, Philippines - Gipaluhod sa Cabadiangan sa pagpangulo nilang ex-pros Bruce Dacia ug Marlon Basco, ang karibal nga Ave Maria Sanctuary Park-USJR Xmen 2, 104-93 aron sakmiton ang korona sa Basak, Compostela basketball tournament niadtong Domingo.
Wala kapugngi si Dacia sa iyang pagmangtas sa ilawom ug miposte'g 33 puntos aron pangulohan ang Cabadiangan, samtang si Basco nga walay nakapiog sa rebounding, miamot og 26 puntos.
Miduga'g kalig-on sa Cabadiangan mao ang presensiya ni SWU Cobras’ point guard Eliud Poligrates, kinsa mitunol og 21 puntos.Ang Xmen 2 kausa lang makatilaw og labaw, 20-25 sa sayong bahin sa unang kuwarter kay gikontrolar sa Cabadiangan ang duwa.
Ang Cabadiangan mibulsa sa P8,000 sa maong kadaugan.
Si Frangel Omolon maoy nangu sa Xmen2 sa iyang 15 puntos, samtang sila si Danny Aying ug Aldrin Ocañada miamot og 13 puntos matag usa.
Ang Ave Maria nakadawat og P5,000 isip first runner-up.
PUNTOS MATAG USA
Cabadiangan (104) - Dacia 33, Basco 26, Poligrates 21, Zanoria 9, Mondragon 8, Mepaña 4, Paradiang 2
Ave Maria-Xmen 2 (93) - Omolon 15, Aying 13, Ocañada 13, Duran 8, Amores 7, Cortez 7, Tundag 7, Lapiz 4, Labares 4, Dela Rama 3 (BANATNEWS)