CEBU, Philippines - Milampos ang B Meg-UV Baby Lancers sa ilang tinguha sa pagsakmit sa korona human ilang gitiwasan ang Smart-Olongapo kagahapon sa iskor, 75-66 aron mahimong kampiyon sa 2010 National Basketball Training center (NBTC) National Finals basketball tournament didto sa San Juan Arena sa Metro Manila.
Ilang gilubong ang Olongapo atol sa ilang non-bearing game sa miaging adlaw, 90-69 ug mitapos sa tournament nga naghupot og 4-0 nga baraha human sab ilang gitagsa-tagsa og latos ang Smart-Cagayan de Oro ug Smart-Laguna.
Sila si Gerald Legarde ug Mark Linao maoy nangu sa Baby Lancers pinaagi sa ilang 11 puntos matag usa samtang ang Smart-Olongapo gipangulohan ni Lomel Loyola kinsa mi-iskor og 12 puntos.
Si James Regalado kinsa midugang og siete puntos alang sa Baby Lancers maoy napiling MVP ug si Edcor Marata kinsa mibayno og otso puntos nalakip sa Mythical Five ug ang laing tulo gipili gikan sa laing teams.
Ang Baby Lancers moabot sa Sugbo karong buntag matod pa ni coach Delfin Pepito Jr. kinsa nakadawat og mga pahalipay nga mensahe pinaagi sa text human sa duwa ilabi na gikan sa mga tagdumala sa University of the Visayas sumala pa ni Marichu Cabanilla, ang secretary ni 1st District Congressman-elect Eduardo R. Gullas.
Puntos matag usa:
B Meg-UV (75)— Legarde 11, Linao 11, Marata 8, Regalado 7, Flores 7, Perolino 6, Aguirre 5, Mendoza 5, Arong 4, Smith 2, Cenita 2, Suan 2, Diputado 2, Dotiilos 2
Smart-Olongapo (66)— Loyola 12, Santos 8, Perez 7, Maglasang 6, Barrera 5, Timpug 5, Pecache 5, Dalpoloy 5, Castillo 4, Abalos 2, Tabudlong 2. – BANAT NEWS