Losiaboi, Dueñas ug DL Santos hawud sa dagan

CEBU, Philippines - Ang Kenyan runner nga si Simon Losiaboi misakmit og laing titulo, ning higayuna sa labing unang Eagle Run 10 K division didto sa Cebu Doctor’s University sa Mandaue Reclamation Area kagahapon pinaagi sa pagrehistro og 32:32.30.

Siya gisundan nila ni Adonis Singson sa oras nga 33:14.77 ug Riez Enriquez 33:30.89 isip second ug third placer.

Samtang sa ikaduhang higayun, naapsan na usab sa garbo sa Southwestern University (SWU) Mary Joy Tabal ang beteranang si Madelyn Carter sa 10k women’s division, si Tabal miabot sa finish line sa oras nga 38:42.52, samtang si Carter mitapos sa lumba sa oras nga 39:19.68. Si Mereeis Ramirez maoy third placer sa oras nga 43:55.75.

Sa 10k SHS-Alumni category, si Arnold Go mikutlo og oras nga 43:47.97 alang sa unang dapit, gisundan ni Kenneth Yu sa ikaduhang dapit sa oras nga 50:02:11 ug Benedict Benedicto sa ikatulo sa oras nga 50:21.84.

Gatusan usab ang nanagan sa 5k ug 3k run, apan ang maong kategoriya gideklara nga usa lang ka fun run event.

Sa laing bahin, giharus nila ni Philip Dueñas sa SWU ug Mary Grace Delos Santos ang kampiyonato sa tagsa-tagsa nila ka dibisyon sa 1st Fair Trade Run kagahapon sa buntag didto sa Asiatown I.T Park, ning syudad.

Si Dueñas maoy nag-unsa sa premier mens division, gisundan nila ni Jess Gonzaga ug Ian Bernido kinsa mipahiluna sa ikaduha ug ikatulong dapit. Si Heronesio Padilla maoy misakmit sa ikaupat nga dapit ug si Paul James Zafico mitugpa sa ikalimang luna.

Sa women’s division, ang RP triathlete nga si Lhoriz Echavez maoy nagsunod ni Delos Santos, samtang ang kanhi RP weightlifter nga si Emily Rosas ug Arren Mendezona-Allegretti midaog usab isip third and fourth placer.

Ang inilang TV and sports anchor nga si Dyan Castillejo mipakita usab sa iyang kapaspas human siya mipwesto sa ikalimang dapit sa women’s division.

Midaog sa 5k division mao sila si Jorry Ycong ug Aiza Suaybaguio kinsa nanghawud sa tagsa-tagsa nila ka dibisyon.Si Ycong uban nila ni Joel Delposo ug Michael Estrera maoy top three-finisher sa men’s open, samtang si Suaybaguio giubanan nila ni Crizelle Diongson ug Lorna Olarita isip runner-up.  –  BANAT NEWS