Melendez moabot ugma

CEBU, Philippines - Duha ka langyaw'ng boksidor ang moabot ugma dinhi sa Sugbu aron mopakita sa ilang kabangis batok sa mga Pinoy'ng boksidor sa "Hangad na Paghihiganti" karong Domingo sa gabii diha sa Waterfront Cebu City Hotel and Casino sa Brgy. Lahug, ning siyudad.

Unang moabot ang kontra ni Michael Domingo sa ALA Boxing nga si Colombian knockout artist Luis Melendez ug kaubanan sa alas-7:15 sa gabii diha sa Mactan International Airport.

Gikan sa airport, si Melendez mopatighog sa Sports Exchange Bar sa Mango Square Mall alang sa usa ka panihapon uban sa mga Cebu sportswriters.

Mosunod og abot sa alas-9:45 sa gabii mao ang Kenyan nga si James Kimori, kinsa makigbinukbukay ni comebacking Jimrex Jaca sa ilang 10-rounder bout ubos sa 137 lbs. division.

Ang bantamweight contender nga si Melendez ug si Domingo mag-abot karong Huwebes sa alas-11 sa buntag alang sa final press conference diha sa The Nook sa City Sports Club. Inig ka ugma sa alas-10 sa buntag himuon ang official weigh-in diha Coral Room diha sa Waterfront.

Duha ka ALA prospects nga sila si Jason Pagara ug James Bacon mopakita sab sa ilang abilidad batok nila ni Romeo Jakosalem sa Davao ug Cerilo Espino sa Batangas, samtang si Kotsky Ebalang sa Cagayan De Oro makigbahugbahog ni Rocky Sismundo sa Tagbilaran.

Mosaka usab sa ring ang taga-Mandaue nga si Welberth Loberanis batok ni Anthony Galigao, samtang si Jocel Estopa sa Consolacion mosukod sa abilidad ni Gerald Ranque sa Harada Stable.   (BANATNEWS)