KCB padayong lider sa Emil's Cup

CEBU, Philippines - Mikulit sa ilang ikalimang daug ang Karl Customs Brokerage (KCB) ni team owner Nelson Arnoco aron paghupot sa solong liderato human ilang gipukan ang Grace Jay quintet gikan sa Naga, Cebu sa iskor, 79-77 kaniadtong Biyernes sa gabii sa nagpadayong Emil's Cup 2010 summer basketball tournament didto sa Jerry Oberes open court sa barangay Lipata, Minglanilla.

 Ang Grace Jay maoy unang nagkontrolar sa duwa dihang naglabaw sila sa sayong bahin sa first period diin sila ang naglabaw, 27-15 pinaagi sa pagtimon sa gamitoy nga point guard nga si Eddie Ravanes kinsa mihakot ug 13 puntos sa maong period aron pangulohan ang iyang team sa iyang 24 puntos.

 Hinoon, wala mag-usik og higayon misumbalik dayon ang KCB ug migamit kini'g 1-2-2 nga zone defense ug mibawos og pabuhagay og 30-10 scoring run aron molabaw atol sa halftime, 45-37.

Ang duha ka teams naghugtanay sa bakus atol sa third period ug nagtabla pa ang iskor sa 77 sa kataposang 33 segundos pinaagi sa three-pointer ni Ravanes.

Si Dixon Fuentes hinoon maoy nahimong bayani alang sa KCB dihang nakapasulod siya sa iyang lay-up atol sa fast-break, 79-77 pipila na lang ka segundos ang nahibilin  ug misipyat ang Grace Jay sa kataposang nilang possession.

 Si James Babiera maoy nnagu sa KCB sa iyang 27 puntos samtang si Mark Navaja midugang ug 11 puntos.

Laing tulo ka players sa Grace Jay ang miamot sab ug double figures diin mi-iskor ug 12 puntos si John Santos, may 11 puntos si Edmy Rivera ug may 10 puntos si Bino Repunta.

Puntos matag usa:

KCB (79)—   Babiera 27, Navaja 11, Belocura 9, Gerson 8, fuentes 7. A. doble 4, Nwanaka 4, Catipay 2, Arnoco 2, Doble 2, Aguirre 2, Jungoy 1

Grace Jay (77)— Ravanes 24, Santos 12, Rivera 11, Repunta 10, Rhods 6, Panilag 4, Rabs 4, Cañada 2, Sena 2, Buenamente 2. – BANAT NEWS