Binukbukay sa Country Mall

CEBU, Philippines - Usa ka dosenang parisan sa mga boksidor ang magsinukliay'g kumo sa laing hugna sa Summit Natural Drinking Water Fight Night-Amateur Series karong gabii diha sa Gaisano Country Mall, carpark sa Banilad, ning siyudad.

Siyam ka timbang gikan sa 28 kgs. ngadto sa 56 kgs. ang sangkaan sa mga amateur prospects.

Si Ramel Casañares sa Banilad Elementary School makigsangka ni John Ver Otik sa Lahug sa opening bout. Ang paryente ni ALA sensation AJ Banal nga si Polid Banal sa Ermita moharong ni Johnloyd Transporte sa Mabolo Elementary School, samtang si Raymund Namocatcat sa Mabolo makigsangka batok ni Bryan Remedio sa Cabancalan Elementary School.

Si Edu Rosal sa Mandaue makigharong ni Elecio Taruc sa Lapu-Lapu City ug si Christian Apawan sa Bantayan makigbinukbukay batok ni Albert Pagara sa Misamis Occidental.

Mokompleto sa fight card nga gipasiugdahan sa ALA Gym ug Summit Natural Drinking Water mao sila si Rhiyan Canillas batok Mark Colaste ug Mark Bernaldes batok ni Baselio Sultan Jr.   (FREEMAN NEWS)