Jaca moaway sab sa "Hangad na Paghihiganti"

MANILA, Philippines - Bag-o pa lang mibutyag sa ilang plano atol sa press conference niadtong miaging semana, ang ALA Promotions modalit na sab ngadto sa mga Pinoy nga mahigugmao'g boksing og laing world class boxing event nga uloha'g "Hangad na Paghihiganti" karong Mayo 23 diha sa Waterfront Cebu City Hotel and Casino sa Lahug, ning siyudad.

Ang maong boxing card pangulohan sa Pinoy'ng si Michael Domingo ug Colombian Luis Melendez, kinsa maoy responsable sa pagparetiro ni Z 'The

Dream' Gorres sa miaging tuig.

Ang maong kumbati gipresentar sa higanteng television network ABS-CBN Sports ug sa ALA Promotions, unang boxing promotion outfit sa Pilipinas.

Isip kabahin sa ALA Promotions thrust pagtabang pag-promote sa boksingero dili lang sa ALA Boxing Gym, ang "Hangad na Paghihiganti" naghatag sab og kahigayonan sa tanang mahiligon sa boksing sulod ug gawas sa atong nasud sa pagpakita sa ilang katakus.

Sa supporting-main event pagabitoonan kini ni Jimrex Jaca.   Si Jaca, 26-anyos nga nihagit ni Juan Manuel Marquez alang sa interim WBO featherweight title niadtong Nobiyembre 25, 2006, bag-o lang nihaw-as og knockout nga kadaugan sa miaging Enero 23 didto sa Manila.

Si Jaca makigharong ni Kenyan knockout artist James Kimori. Si Jaca nga lumad nga taga-Dumaguete, Negros Oriental ug nagbasi na karon dinhi sa Sugbu mipaubos og subsob nga bansay-bansay alang ning maong away ug aron ipamatuod nga aduna pa siya'y ikabuga nga sarang ikapasigarbo sa nasud.

"We feel this is now the time to go to the next level. From now on, we will not only be promoting ALA fighters, but other Filipino and foreign fighters as well," nagkanayon si Michael Aldeguer, ang presidente sa ALA Promotions atol sa press conference sa Cebu media. (FREEMAN NEWS)