Adlawan hari sa Mayor Neneth Reluya Cup

CEBU, Philippines - Ang numero unong motocross rider sa Sugbu nga si Jon-Jon Adlawan maoy nidominar sa pro open sa fourth leg sa 2010 MS Motosuit Motocross Series nga giuloha’g “Mayor Neneth Reluya Cup” niadtong Domingo didto sa San Fernando, Cebu.

Gipilde ni Adlawan si Paolo Inoc alang sa unang dapit, samtang si Irwin Ramas-Uypitching mipahiluna sa ikatulo.

Bisan pa niini, si Uypitching nakabitbit sab og titulo human niya gidominar ang expert class. Si Inoc nahimutang sa ikaduha, samtang si Adlawan nalabay sa ikatulo nga dapit.

Ang igsuon ni Irwin nga si Adam, midaog sab og titulo human maghari sa novice open production, samtang si Dongkey Sanchez ug Cyril Tariman maoy miangkon sa ikaduha ug ikatulo nga mga dapit.

Si Clark Wagas misakmit sa kampiyonato sa intermediate class, gisundan ni Weng Yapparcon ug John Flores alang sa ikaduha ug ikatulo nga dapit.

Si Jun Enriquez maoy nidominar sa executive A, si Nonoy Reluya sa NR Racing mao ang nanghawod sa executive B, samtang si Roscel Gungob sa MTS Danao mao ang nidominar sa executive C.

Sa iyang bahin, si Dongkey Sanchez, mihakot og duha ka titulo pinaagi sa local ug open enduro.

Sa mini division, si Ryan Gabuya mao ang mipatigbabaw, samtang si BJ Pepito mao gihapon ang naghari sa pewee class.

Sa ikaduhang higayon, si Anthony Lapadiso mao na sab ang midaog sa underbone crown.

Si Cyril Tariman mao ang kampiyon sa beginners open production, gisundan ni Whelbert Marano ug Jake Villarino.

Ang maong series gipaluyohan ni Mayor Neneth Reluya, Nonoy Reluya, Castrol Power One, Fork Oil Gaib USA, MS Digital Print, MS Unlimited ug MS Productions.   (BANATNEWS)