Donaire gihagit ni Montiel

CEBU, Philippines - Gihagit karon ni WBO/WBC bantamweight champion Fernando Montiel si Nonito “The Filipino Flash” Donaire alang sa usa ka sangka karong tuiga.

Gihagit ni Montiel si Donaire, human sa malampusong sangka sa Mehikano niadtong Biyernes diin iyang gipatumba sa round 4 ang defending WBC champion nga si Hozumi Hasegawa sa ilang unification bout didto sa Japan.

Si Montiel nagkanayon nga daghan pa og mga lig-on nga boksidor sa iyang timbang, apan nakita niya nga mas daku nga away kung ang WBA interim superflyweight champion nga si Donaire ang iyang atubangon ibabaw sa ring.

Gawas ni Donaire, nasaytan usab ni Montiel ang Armenian knock-out artist nga si Vic Darchinyan kinsa mao ang nagkupot sa WBA ug WBC super flyweight title.

Abli si Montiel sa posibilidad nga huwaton niya ang mugawas nga mananaug Donaire-Darchinyan “rematch”, apan wala gitino sa Mehikano kung munaog ba siya sa super flyweight division o depensahan ang iyang bantamweight title.

Si Montiel misakmit sa ikaduha niyang sunod-sunod nga daog karong tuiga, una niadtong Pebrero 13, diin iyang gipatikuko sa round 1 ang Sugbuanong si Ciso Morales didto sa Las Vegas. - Lemuel P. Maglinte gikan sa boxingscene.com (BANAT NEWS)