Flores hari sa Mayor Ricky Ramirez Cup

CEBU, Philippines - Napugngan ni John Flores si Jubenile Abellar, kinsa buot mosakmit og   double-victory human niya gisakmit ang titulo sa experts class sa 2010 MS Motosuit Motocross Series-2nd Mayor Ricky Ramirez Motocross Cup niadtong Domingo didto sa Medellin.

Ang pambato sa Motofix nga si Abellar maoy nanghawod sa pro open race category, apan napakyas kini pagkuha sa titulo sa expert class human   kini maapsi sa batan-ong si Flores.

Si Clark Wagas, kinsa   mipahiluna sa ikatulong dapit sa expert class, misakmit sa titulo sa   intermediate division, samtang si Donkey Sanchez midominar sa local enduro, open enduro ug sa novice open production.

Milangkat sab og sunod-sunod nga titulo si Siegfred Ornopia sa executive A, samtang si Jun Enriquez maoy hari sa executive B ug Sergio Chua sa executive C.

Sa pewee category, gisakiyo ni BJ Pepito ang kampiyonato, samtang ang managsuong Ornopia nga sila si Kerry Keizer ug Ken Kerry mao ang mi-okupar sa ikaduha ug ikatulo nga mga dapit.

Misakiyo sab og titulo sila si Denmar Soratan ug Roscel Gungob sa MTS Danao Racing Team. Si Soratan mao ang nanghawod sa mini class, samtang si Gungob nanghawod sa beginners open production. – BANAT NEWS