CEBU, Philippines - Duha ka dekalibreng koponan sa hayskol dinhi sa Sugbu ang magpuhalay sa ilang abilidad didto sa habagatang bahin sa Sugbu diin ang topseed Enervon C-UC Junior Webmasters makigsangka batok sa second-ranked PTT Fuels-UV Baby Lancers sa knockout finals sa 4th CESAFI Partner’s Cup karong alas-5:30 sa hapon didto sa Dumanjug Sports Complex.
Ang Partner’s Cup finals mosunod unta sa “best-of-five series” format tungod kay mao sab kini ang gipatuman alang sa collegiate division, apan matod pa ni CESAFI commissioner Felix O. Tiukinhoy, Jr, ilang nauyonan nga himuon na lang kini nga usa ka duwa tungod sa kakulang sa panahon sa mga players, kinsa buot na nga mobakasyon.
Ang Junior Webmasters mitapos sa eliminasyon pinaagi sa 6-0 sweep, apan dali kini nilang hikalimtan karong gabhiona kun dili sila mahimong kampiyon.
Atol sa CESAFI regular season sa miaging tuig, ang Junior Webmasters miharos sab sa Webmasters, apan pakyas kini paglangkat sa korona natagak sa semifinals batok sa University of San Jose-Recoletos (USJR) Baby Jaguars.
Karon nga gihatagan sila’g laing higayon nga mosakmit sa korona, dili na nila usikan ang panahon ug kinahanglan lang sila og 40 minutos nga mopakita maanindot nga duwa aron matuman ang ilang gipangandoy.
Sa laing bahin, pakyas sab sa pag-abante ang Baby Lancers sa finals sa miaging tuig dihang gipalagpot sila sa mas gagmay apan abtik nga Cebu Institute of Technology (CIT) Wildkittens, kinsa maoy midaog sa korona sa usa ka makasaysayanong best-of-five championship series pinaagi sa pagbuntog sa Baby Jaguars.
Batok sa Junior Webmasters, anaa ra usab sa mga kamot sa Baby Lancers unsaon nila pagmaneobra aron mobawos sa ilang kapildihan sa elimination niadtong Enero. – BANAT NEWS