Lao Customs, Basic Land gilihia'g daog sa 1st Elle Lao Cup

CEBU, Philippines - Gillihian og daog ang Lao Customs Brokerage ug Basic Land human sa ilang gipilde ang tagsa-tagsa nilang kaatbang sa 1st Elle Lao Cup 2010 basketball tournament didto sa Pusok gym sa Lapu-Lapu City.

Ang Lao Customs walay kukaluoy nga milubong sa TMI sa iskor nga 51-35, samtang ang   Basic Land mipukan sa TNT Express sa iskor nga 63-58,

Sayong nanginit ang Lao Customs diin miposte kini'g otso puntos nga bentaha, 12-4 sa first period. Mibahar ang mga tira sa Lao Customs sa mosunod nga duha ka kuwarter, apan kalit nga mibalik ang ilang kainit sa fourth period sa pagpangulo nilang Jonnel Entero ug Filmax Almendras aron hingpit nga maangkon ang kadaugan.

Sila si Entero ug Almendras maoy topscorer sa Lao Customs sa parehong mihakot og nuybe puntos. Si Leter Dayon miabuno og otso puntos, samtang ang ilang team manager Ronald Pino ug Chrisilo Castro miamot og singko puntos matag usa.

Sa laing bahin, ang Basic Land mikontrolar sa tibuok duwa diin miposte kini'g sayes puntos sa halftime, 34-28 ug ila pang nainat ang labaw ngadto sa 13 puntos paingon sa final period, 47-34.

Puntos Matag Usa

Unang duwa:

LAO CUSTOMS BROKERAGE (51) - J. Entero 9, Almendras 9, Dayon 8, N. Entero 7, Pino 5, Castro 5, Vega 3, Odilao 2

TMI (35) - Pangan 14, Ruelan 4, Meniro 4, Bacalso 2, Lacasandili 2, Madrona 2, Gresaldo 2

Ikaduhang duwa:

BASIC LAND (63) - Ochea 21, Toston 20, Espinosa 14, Dente 5, Tabug 3, Silawan 2

TNT (58) - Amit 23, Legaspi 10, Encabo 6, Oquias 6, Encorporado 4, Tecson 4, Condrado 3, Pajugot 1. – BANAT NEWS