USJ-R Jaguars misakmit sa ikaduhang korona sa Partner's Cup

CEBU, Philippines - Gitiwas sa Ave Maria Sanctuary Park-USJR Jaguars ang nasugdan nilang pagkawot dihang ilang giharos ang tulo ka duwa pinaagi sa paglubong sa San Marino Corned Tuna-USC Warriors, 82-68 aron sakmiton ang ikaduhang korona sa seniors division sa 4th CESAFI Partner's Cup kagabii didto sa Cebu Coliseum.

Gawas lang sa panagtabla, 12-all paghuman sa unang 10 minutos sa duwa, ang Jaguars nidominar sa sunod nga tulo ka mga kuwarter. Wala hinuon dayon mosurender ang Warriors ug nakatabla sila pagbalik, 37-all human sa itsa ni Sam Hermosa.

Si Aniceto Lapiz, Jr. mitusak og usa ka triple aron hatagan ang USJ-R og tres puntos nga labaw, 40-37 ug gikan niadto kontrolado na kaayo nila ang bisan pa sa hugot nga depensa nga gipatuman sa Warriors.

Sama sa naandan, ang beteranong tirador nga silang Mannie Gabas ug Armand Ponce maoy nangulo sa Jaguars ni coach Edito Salacut nga nagkumboya og 28 puntos. Samtang si Kurt Amores, kinsa nindot kaayo og shooting sa foul line, mihirit og 11 puntos alang sa Jaguars, kinsa maoy unang koponan nga mihipos og duha ka korona sa Partners Cup.

Sa sayong bahin, ang PTT Fuels-UV Lancers ug ang Ave Maria-USJR Baby Jaguars maoy miluklok sa ikatulong dapit.

Ang Lancers mirakrak og 14 ka tres aron panitan ang Aerosol-USPF Panthers sa iskor nga 79-73 sa collegiate division, samtang ang Baby Jaguars milayog sa Bibbo-CIT Wildkittens aron pagposte og 94-70 nga kadaugan.

Puntos Matag Usa

Unang duwa:(Juniors for 3rd)

Ave Maria-USJR (94) - Escatron 20, Muñez 20, Trozo 16, Autentico 13, Alob 11, R. Senining 4, Senining 4, Montecillo 2, Legaspi 2, Eborlas 2

Bibbo-CIT (70) - Batiquin 12, Tejam 11, Limalima 10, Sanchez 9, Bancale 9, Figuracion 8, Gera 7, Pamaong 4

Ikaduhang duwa:(Seniors for 3rd)

PTT Fuels-UV (79) - Lao 15, Cincoflores 15, Mercader 13, Calo 10, Silva 6, Olivares 5, Abad 4, Perolino 3, Señeris 3, Manigque 2

Aerosol-USPF (73) - Rivera 17, Durano 11, Fuentes 10, Dajalos 10, Tinoy 8, Ferraren 7, Filoteo 6, Sereño 4 

Ikatulong duwa:(Seniors, Finals)

Ave Maria-USJR (82) - Gabas 16, Ponce 12, Amores 11, Villaver 10, Dela Peña 9, Delfino 7, Dela rama 4, Duran 4, Lapiz 3, Senining 3

San Marino-USC (68) - Hermosa 31, Cortes 13, Bautista 7, Padillo 6, Cantonao 5, Panerio 4, Bakker 2. – BANAT NEWS