Ave Maria, San Marino magtiwas

CEBU, Philippines - Tinguha karon sa Ave Maria Sanctuary Park-USJR Jaguars nga molubong og 2-0 nga abante sa dihang ila na sab nga sangkaon ang San Marino Corned Tuna-USC Warriors   sa Game-2 sa 4th CESAFI Partner’s Cup "best-of-five" championship series diha sa Cebu Coliseum.

Human miugbok og 88-78 nga kadaugan niadtong Biyernes, ang Jaguars midaog na sa duha ka higayon batok sa Warriors lakip ang 77-64 nga kalampusan sa elimination.

 Ang ilang mas taas nga kasinatian maoy gigamit nga hinagiban sa Jaguars sa Game-1 dihang nakarekober gihapon kini bisan pa'g gihulga sa Warriors makaduha ka higayon.

Way suwerte ang Warriors kay bisan pa sa grabeng paningkamot ni Giovanni Padillo, wala siya'y nakuhang suporta   gikan sa iyang mga kauban ilabi na ang pipila ka pambato nga sila si Michael Cantonao, Sam Hermosa ug Jabe Bautista nga pulos gipiit og maayo.

Sukwahi sa Jaguars, kinsa misandig sa ilang mga beterano sama nilang Manny Gabas, Armand Ponce ug Jabe Delfino nga daku kaayo’g gikatabang sa opensa. Mipakita sab sa ilang katakus sila si Kurt Amores, Edwin Bibera, Marvin Duran ug Jun Lapiz.

Sa laing bahin, ang Aerosol-USPF Panthers mag-atubang karon og bug-at nga tahas diin ilang suwayan pagpukan ang PTT Fuels-UV Green Lancers sa Game-2 sa ilang best-of-three series.

Sama sa USPF, ang Bibbo-CIT Wildkittens nagkinahanglan sab og laing usa ka daog batok sa Ave Maria-USJR Baby Jaguars aron maangkon ang ikatulong dapit sa juniors division.   (BANATNEWS)