1st Elle Lao Cup buksan na

CEBU, Philippines - Ang gikahinaman nga 1st Elle Lao Cup 2010 basketball tournament pormal nang buksan karong ala-1 sa hapon didto sa Pusok gym sa Lapu-Lapu City. 

Sugdan ang kalihukan pinaagi sa motorkada gikan sa Mandaue City paingon na ngadto sa Pusok gym diin didto himuon ang hamubo nga programa.

Walo ka teams ang magtigi alang sa labing unang korona ning maong torneyo nga gipasiugdahan sa Lao Customs Brokerage ug sa suporta sa Basic Land Realty.

Mga koponan uban sa ilang tagsa-tagsa ka team managers mao ang Lao Customs Brokerage ni Ronald Pino, LCB ni Jonnel Entero, Pacific Concord ni Jomar Greljaldo, BasicLand Realty ni Richmond Dente, Airlift ni Virgilio Dumabuk, TNT Cebu ni Allan Encorporado, Teradyne ni Luis Remidio ug Kuehne+Nagel ni Rodel Limdaga.

Usa sa mga highlights sa opening ceremonies mao ang paghagpat og "best muse" ug ingon man "best in uniform."

Ang torneyo mosubay og single-round robin diin ang top four teams magsangka sa crossover semifinals. Ang mga mananaog maoy magsangka sa tinaktakay nga kampiyonato. – BANAT NEWS