CEBU, Philippines - Sugdan na sa Ave Maria Sanctuary Park-USJR Jaguars ug sa San Marino Corned Tuna-USC Warriors ang ilang kampanya aron mokulit og kasaysayan nga labing unang team nga modaog og duha ka korona sa CESAFI Partner’s Cup sa pagsugod sa ilang "best-of-five" championship series karong adlawa diha sa Cebu Coliseum.
Ang kasaysayan anaa pabor sa Warriors, apan kinahanglan ila una kining paningkamotan susama sa paagi sa ilang pagpalagpot sa powerhouse University of the Visayas (UV) Green Lancers.
Tinguha karon sa Jaguars nga mabawi ang korona ug ang ilang himuong hinagiban ang mas taas nila nga kasinatian batok sa Warriors.
Unang nakapaisa og kilay ang Warriors dihang mikulit sila’g sweep in reverse human sila mapilde sa labing unang duwa batok sa Jaguars.
Ning adlawa, panahon na sab sa Warriors aron nga mobawos ngadto sa Jaguars. Hinuon, nakapabor ang Jaguars kun manpower ang hisgotan tungod sa ilang tulo ka beterano nga haum sa tanang posisyon.
Si point guard Armand Ponce, forward Jabe Delfino ug ang sentrong si Mannie Gabas igo na kaayo maoy alas sa kampanya sa Jaguars.
Abagan kini nilang Kurt Amores, Edwin Bibera, Marvin Duran, Aniceto Lapiz Jr. ug Joseph Villaver ug uban pa.
Ang Warriors magsalig nilang pull-up shooter Giovanni Padillo, streak shooter Michael Cantonao, Sam Hermosa, Jabe Bautista, Edward Bakker ug sa sentrong si Joven Cid Cortes.
Sa dili pa sila mag-abot, magtakus una ang PTT Fuels-UV Lancers ug Aerosol-USP Panthers alang sa ikatulong dapit sa collegiate division sa ilang "best-of-three" series.
Sa unang duwa, ang Ave Maria-USJR Baby Jaguars makigsangka batok sa Bibbo-CIT Wildkittens alang usab sa ikatulong puwesto sa secondary division pinaagi gihapon sa "best-of-three" series.
Ang secondary finals tali sa PTT Fuels-UV Baby Lancers ug sa Enervon-UC Junior Webmasters unya pa sugdan sa Abril 21 tungod kay ang UV morepresentar sa Sugbu sa Palarong Pambansa didto sa Tarlac sa Abil 11-18. – BANAT NEWS