CEBU, Philippines - Lain na sab nga dakung lumba diin ang mga inilang runners dinhi sa Sugbu mopakita'g aksiyon sa ipahigayong Visayas leg sa Pinay In Action karong Abril 11 diha sa Asiatown IT Park, ning siyudad.
Ang lumba adunay tulo ka kategoriya nga mao ang 3K, 5K ug 10K Open.
Giklaro sa mga organizers nga bisan giulohan og "Pinay In Action," makahimo gihapon sa pag-apil ang mga lalaking runners isip open race.
Gidasig sa organizers ang male runners nga paapilon sab ang ilang mga asawa, igsuong babaye, mga paryenting babaye o inahan aron mohatag og suporta atol sa lumba.
Si Senator Pia Cayetano, kinsa mahiligon sab og lumba, maoy dinapit atol sa lumba. Si Cayetano, kinsa midagan sa miaging Milo Marathon dinhi sa Sugbu, mopahigayon usab og running clinic.
Gawas sa lumba, ang "Pinay In Action" mopasiugda usab og all-women sports event, fitness clinics ug seminars kabahin sa women’s health, anti-violence against women ug breastfeeding.
Ang lumba gipasiugdahan sa Run
Check uban ni race directors Annie Neric ug Kenneth Casquejo.
Aduna kini registration fee nga P250, libre na race number, souvenir shirt, route map ug goodie bag. Ang entry forms makuha diha sa Leona’s Cakes and Pastries-Mabolo branch. (BANATNEWS)