Paneros ug Pecancela daog sa IBP Hoop

CEBU, Philippines - Parehong mikulit og daog ang Paneros five ni skipper Nilo Balorio ug ang Pecandela Law Firm batok sa tagsa-tagsa nila ka kaparang aron saw-an ang liderato sa 4-1 nga baraha atol sa nagpadayong Integrated Bar of the Philippines (IBP) 2010 basketball tournament didto sa Capitol Parish gym sa dalan Escario, ning dakbayan.

Gidominar sa Paneros ang Mt. Zion gikan gyud sa pagsugod sa duwa aron mo-iskor og 64-50 nga kadaogan samtang ang Pecandela dribblers naka-ipsot batok sa Iron Eagles sa usa ka low-scoring ballgame sa iskor, 40-37 aron parehong maghupot og upat ka daog sulod sa lima ka duwa batok sa usa lang ka pilde.

Gipangulohan ni Barry Busi ang Paneros pinaagi sa paghakot og 13 puntos ug mi-abag sab sa opensa sila si Gerald Mendoza ug Balorio kinsa midugang og double figures aron pabiling huptan sa Paneros ang labaw nga wala na mabadbad sa Mt. Zion ang maong labaw alang sa 14 puntos nga kadaogan.

Ang Mt. Zion kinsa midailos ngadto sa 2-3 nga baraha, gipangulohan nilang Ricky Macabaya ug Benjo Macion kinsa miposa og 15 og 10 puntos, matag usa.

Sa laing duwa, si Jessie Capoy maoy nangu sa Pecandela Law Firm pinaagi sa iyang 14 puntos ug siya lang ang bugtong player sa ilang team nga nakahimo’g double figures. Ang pilderong Iron Eagles gipangulohan nilang Giovanni Sususco ug Al Lagahit kinsa parehong mipugnit og 12 puntos.

Midaog sab ang Young Lawyers Association of Cebu (YLAC) batok sa Bros N Law, 67-51 alang sa ilang ikatulong daog sulod sa lima ka duwa.

Ang Bros N Law kinsa gitimonan nilang Estong ug Enric Rama, naghupot na karon og 2-3 nga baraha ug nakigtabla sa Mt. Zion sa team standings.

Sila si Val Ligutan ug Resty Arnaiz mibugha og 18 matag usa aron pangulohan ang YLAC samtang si Richard Bauzon maoy nangu sa Bros N Law sa iyang 16 puntos.

Sa ika-upat ug kataposang duwa nga gikatakda niadtong adlawa, midaog nga walay mitulo nga singot ang Super Idols dihang mi-default ang walay daug-daog nga Yan C. Rico aron pag-abante sa unahan sa ilang 3-1 nga baraha.

Puntos matag usa:

First Game:

Paneros (64)— Busi 13, Balorio 12, Mendoza 11, Calipayan 6, Cabilte 6, Molde 6, Alino 4, Dinopol 2, Cagulada 2, Manching 2

Mt. Zion (50)—Macabaya 15, Macion 10, Riveral 6, Narido 5, Gidayawan 5, Flroes 4, Elmido 3, Ortiz 2

Second Game:

Pecandela (40)— Capoy 14, Gamallo 8, Pepito 6, Avila 5, Canete 4, enad 3

Iron Eagles (37)— Sususco 12, Lagahit 12, Alviola 6, Abcede 2, Solis 2, Negapatan 2, Suson 1

Third Game:

YLAC (67)—Ligutan 18, Arnaiz 18, Sapayan 12, Guieb 10, Hupp 7, Bernido 2

Bros N Law (51)— Bauzon 16, Dumon 13, Javelosa 10, Limalima 8, N. Rama 2, Pareja 2. - Gabby G. Malagar (BANAT NEWS)