CEBU, Philippines - Ang Mawin's Kitchen ni team owners Sherwin Lequit ug Maia Adriatico mikulit og kulbahinam nga kadaugan batok sa crowd-favorite Emilmich, 79-78 aron pagsakmit sa titulo sa JS Contractor’s Cup 2010 basketball tournament didto sa Vicente Sotto Memorial Gym sa barangay Punta Princesa, ning dakbayan.
Kanunay naggukod ang Emilmich sa unang-duha ka kuwarter ug mihulga aron langkaton ang korona human miposte og 62-60 nga labaw paghuman sa third period.
Sa kainit nilang Jun Llenes, Titing Piliotas ug Jimson Olpo nga nagkumboya aron dili sila malubong, mosukli sa halos matag basket sa Mawin’s nga maoy nakapakulba sa dagan sa duwa.
Si Stanley Lequit, ang igsuon ni Sherwin maoy nahimong bayani sa duwa human niya mapasulod ang crucial free throws sa katapusang 14 segundos aron baswaton ang Mawin's ngadto sa kadaugan.
Si Matt Vallejo mipabuto og 23 puntos aron pangulohan ang Mawin's Kitchen, samtang si Egin Taborada miamot og 16 puntos.
Si Llenes mihipos og 22 puntos, samtang sila si Pillotas ug Olpoc mi-iskor og 10 puntos matag usa alang sa Emilmich.
Sa sangka alang sa ikatulong puwesto, ang Panthers mipukan sa Victor Village Residents Association (VVRA) sa iskor nga 75-71.
Si Gobs Baclaan miposa og 20 puntos ug si Weweng Ibrada midugang og 19 puntos alang sa Panthers, samtang sila si Neptune Carungay ug Gerry Empenado mibahog og 23 puntos matag usa alang sa VVRA.
Puntos Matag Usa
Unang duwa:
Panthers (75) - G. Baclaan 20, Ibrada 19, R. Baclaan 11, P. Yray 7, Vallejo 6, A. Yray 6, Dungog 2, amat 2, Padigos 2
VVRA (71) - G. Empenado 23, Carungay 23, Velez 7, Moreno 6, Baric 4, Quiroz 2, Liboon 2, Jayme 2, Dong 2
Ikaduhang duwa:
Mawin’s (79) - Vallejo 23, Taborada 16, Sh. Lequit 12, S. Lequit 7, Madrelino 6, Vinalon 4, Tecosn 3, Bouffard 2, Cabahug 2, Empenado 2, Pineda 2
Emilmich (78) - J. Llenes 22, Pliotas 10, J. Olpoc 10, Iconas 8, Ilagan 8, Badon 8, V. Llenes 5, Vinalon 3, Janolan 2, Olpoc 2. – BANAT NEWS