CEBU, Philippines - Aron tubagon ang yangungo sa mga Sugbuanon, dad-on dinhi sa mga sakop sa JCI Uptown Jaycees ang crowd-favorite Ginebra Gin Kings ug ang Alaska Aces sa Mayo 22 sa usa ka bearing game sa 2010 PBA Fiesta Cup nga ulohan og "PBA Duwa sa Sugbo" diha sa Cebu Coliseum.
Ang 2010 PBA Fiesta Cup sugdan karong Domingo didto sa Araneta Coliseum.
Si JCI Uptown Jaycees past president Dr. Boy Te, kinsa maoy overall chairman sa PBA promotions nagkanayon nga ilang dad-on dinhi sa Sugbu ang Gin Kings tungod kay nakasaad sila sa mga fans dinhi sa Sugbu dihang una silang mi-promote sa duwa tali sa Alaska batok San Miguel Beermen duha na ka tuig ang milabay.
"The game is already in the bag. We already made a down payment to the PBA Commissioner’s Office and we are appealing to the Cebuanos to support this top rank basketball promotion,” matud ni Te atol sa senemanang SCOOP Forum kagahapon didto sa Baseline Restaurant.
Gawas ni Te, mitambong sab ang bag-ong napiling presidente sa JCI nga si Carlos Porras, Jr. ug si Christian Paruan, ang tag-iya sa RC Goldmine nga maoy chairman sa committee on door prizes.
Gipahibalo ni Te nga ang Ginebra adunay maayong import nga si 6-foot-5 Awvee Story. Iya sab nga gipahibalo nga mobalik og duwa si Fil-Am Rudy Hatfield uban sa Kings.
Ang Aces aduna say usa ka alas nga si 6-foot-5 Diamon Simpson, 22 anyos ug usa ka defensive player gikan sa St. Mary’s Gaels. Si Simpson nag-average og 15.5 puntos ug 9.6 rebounds sa NBA D-League.
Ang JCI Uptown Jaycees mohatag og lima ka wheelchairs atol unya sa maong duwa agi’g pagtuman sa ilang umaabot nga socio-civic activities.
Ang mga tiket magkantidad og P700 alang sa ringside, P450 sa lower box, P250 alang sa upper box ug P100 alang sa general admission. – BANAT NEWS