CEBU, Philippines - Andam na ang tanan alang sa Alex Binghay-Ian Zambo 10-Ball Open Billiard Tournament nga ipahigayon karong Marso 18-20 didto sa James Billiard Center sa lungsod sa Barili.
Si Rene Alquizola, kinsa modagan sa pagka-konsehal sa lungsod sa Barili miawhag sa tanang mga magduduwa og billiard sa pagsalmot niining maong torneyo aron mabaid ang ilang abilidad ug kahanas sa maong matang sa paugnat sa kusog.
Matud pa ni Alquizola, nga gawas sa mga giandam nga mga ganting salapi, may mga t-shirts sab nga ipanghatag si Kongresista Pablo John Garcia niadtong mga partisipante ning tulo ka adlaw nga kompetisyon.
Aduna kini registration fee nga P150 matag entrante.
Si Alquizola, usa ka retiradong manager sa DYMR, ang sibyaanan sa gobiyerno dinhi sa Sugbu nagkanayon nga ang pagpahigayon ning maong matang sa torneyo gitumong aron sa pagdasig sa mga Barilinhon nga mahimong hanas sa duwang billiard.
Kini tungod kay gawas nga makalingaw kini sa tawo ug makatabang sa pag-ehersisyo sa lawas, malikay usab ang tawo ilabi na sa mga batan-on sa pagsulod sa mga bisyong makadaot sa ilang lawas ug pangutok.
Usa niini mao ang bisyong may labot sa ginadiling drogas, ug uban pang matang sa bisyo nga maghatag og dili maayong kaugmaon sa mga batan-on.
Ang top five winners makadawat og ganting salapi.
Ang makampiyon mobulsa og P10,000, ang mopahiluna sa ikaduha makaangkon og P7,000, ang motungtong sa ikatulo makadawat og P5,000, ang ikaupat makadawat og P3,000 ug ang mokapyot sa ikalima gantihan og P1,000. (BANATNEWS)