Mayor Jonas Cortes Cup gilusad

CEBU, Philippines - Agi’g pagpangandam sa tinuig nga kapistahan sa ilang mahal nga patron -- St. Joseph, ang kagamhanan sa siyudad sa Mandaue mopahigayon og sports festival nga ulohan og "Mayor Jonas Cortes Cup 2010" nga mosikad karong Sabado diha sa Mandaue City Cultural and Sports Complex.

Usa ka parada nga sugdan sa ala-1 sa hapon ang mobukas sa maong sportsfest nga salmotan sa 27 ka mga koponan gikan sa nagkalain-laing barangay nga sakop sa dakbayan sa Mandaue.

Usa sa mga dinapit sa opening ceremony mao si billiard queen Rubilyn Amit, kinsa mao usab ang World 10- ball mixed doubles champion uban ni legendary pool king Efren 'Bata' Reyes.

Mga events nga tigian mao ang chess, volleyball, volleyball (dayon-dayon), softball, badminton, table tennis, gateball, lawn tennis, boxing ug basketball.

Gipasiugdahan sa Mandaue City Sports Committee ubos sa liderato ni executive director Atty. Hidelito Pascual, ang maong torneyo gipaabot nga matapos sa Mayo 8, nga maoy adlaw sa kapistahan sa National Shrine of St. Joseph. – BANAT SPORTS